Құрылтай сайлауы қарсаңында «Әділет», ЖСДП, «Байтақ», ҚХП, «Ауыл», «Ақ жол» және Respublica партиялары өңірлерде тұрғындармен, педагогтермен, медицина мамандарымен және кәсіпорын ұжымдарымен кездесу өткізді. Жиындарда жұмыс орындарын көбейту, инфрақұрылымды жаңғырту, ауылдарды дамыту, экологиялық мәдениетті қалыптастыру, әлеуметтік қолдауды күшейту, отандық өндіріс пен кәсіпкерлікті қолдау мәселелері көтерілді.
«Әділет» партиясы Алматы облысының халқымен кездесті
«Әділет» партиясының сайлауалды штабы Қонаев қаласында облыс тұрғындарымен кездесті. Жиында жұмыс орындарын көбейту, облыс орталығын дамыту, инженерлік инфрақұрылымды жаңғырту, салық ережелері және балалардың қауіпсіздігі талқыланды.
Партия төрағасы Айбек Дәдебай өңірдегі өндіріс, логистика, туризм мен ауылдық аумақтарды дамыту ұсыныстарын таныстырды. Кандидат Рауан Кенжеханұлы өңірлерде жұмыс орындарын құру мәселесіне тоқталды.
Кәсіпкерлер палатасының өкілі Жанна Қырғызалықызы салық заңнамасындағы өзгерістердің бизнеске әсері туралы сұрақ қойды. Кандидат Ренат Бектұров салық жүйесін қарапайым әрі түсінікті ету және әкімшілік рәсімдерді азайту жөніндегі ұсыныстарды айтты.
Жиында қауіпсіз және инклюзивті орта құру, білім, медицина мен әлеуметтік көмектің қолжетімділігін арттыру, сондай-ақ әлеуметтік нысандар салу жайы да сөз болды.
ЖСДП кандидаттары ауыл тұрғындарының мәселесін тыңдады
ЖСДП атынан Құрылтай депутаттығына кандидаттар Бұланды ауданы тұрғындарымен кездесуін өткізді. Кітапханада өткен жиынға қоғамдық ұйым өкілдері, жастар және еңбек ұжымдарының мүшелері қатысты.
Кандидаттар Ілияс Жанғали мен Ару Алшынбай «Прогресс жолындағы 20 белес» бағдарламасының өңірлерді дамытуға қатысты бағыттарын таныстырды. Кездесуде экономика, ауылдарды қолдау, инфрақұрылымды жаңғырту, жұмыс орындарын ашу, білім мен медициналық қызметтердің қолжетімділігі де сөз болды.
Сұрақ-жауап барысында тұрғындар жолдардың жағдайы, ауызсу мен коммуналдық инфрақұрылымның сапасы, медициналық кадрлар тапшылығы, жастарды жұмыспен қамту және бюджет саласы қызметкерлерінің еңбекақысы туралы сұрақтар қойды. Сонымен қатар ауыл кәсіпкерлігі, тұрғын үй, интернет байланысы, әлеуметтік нысандар және зейнеткерлер мен мүмкіндігі шектеулі азаматтарды қолдау мәселелері көтерілді. Партия өкілдері ұсыныстардың назарға алынатынын мәлімдеді.
«Байтақ»: экологиялық мәдениет – тәрбиеден
«Байтақ» жасылдар партиясының хатшысы, Құрылтай депутаттығына кандидат Владимир Мартель Алматыдағы №80 мектептің педагогикалық ұжымымен кездесті. Сайлауалды науқан аясында өткен жиынға 30-ға жуық мұғалім қатысты.
Кандидат партияның негізгі бағыттары мен бағдарламасындағы білім беру және қоршаған ортаны қорғауға қатысты ұсыныстарды таныстырды. Одан кейін кездесу ашық пікір алмасу форматында жалғасты.
Педагогтер оқушыларға экологиялық білім мен тәрбие беру, балалардың табиғатқа жауапкершілікпен қарауын қалыптастыру және мектептегі экологиялық мәдениетті дамыту мәселелерін көтерді. Сондай-ақ мектеп аумағын абаттандыру, ағаш отырғызу, көгалдандыру жұмыстарын жүйелі ұйымдастыру және оған оқушыларды тарту жөнінде ұсыныстар айтылды.
Кездесуде мұғалімдердің еңбек жағдайы мен әлеуметтік қамсыздандырылуы да талқыланды. Ұжым өкілдері педагогтердің зейнет жасын төмендету мәселесін көтеріп, осы бағыттағы пікірлері мен ұсыныстарын жеткізді.
ҚХП дәрігерлермен әлеуметтік қолдау туралы ой бөлісті
Шымкенттегі №2 қалалық ауруханада ҚХП-дан Құрылтай депутаттығына кандидаттардың медицина қызметкерлерімен кездесуі өтті. Жиынға бюджеттік ұйымдарда еңбек ететін 50-ден астам дәрігер мен медицина маманы қатысты.
Кездесуде денсаулық сақтау қызметкерлерінің әлеуметтік жағдайы мен кәсіби мәртебесін арттыруға қатысты ұсыныстар таныстырылды. Кандидат Ләззат Ақтаева медицина саласындағы еңбек жағдайы, мамандарды әлеуметтік қолдау және дәрігерлерге түсетін әкімшілік жүктеме мәселелеріне тоқталды.
Партия өкілдері медицина қызметкерлерін қызметтік тұрғын үймен қамтамасыз ету, жеңілдетілген ипотека енгізу және жасанды интеллект қолданылатын медициналық қызметтің цифрлық жүйесін құру жөніндегі ұсыныстарын айтты. Сондай-ақ дәрігерлер толтыратын есептер мен өзге бюрократиялық рәсімдерді қысқарту мәселесі де көтерілді. Кездесуде денсаулық сақтау жүйесін дамыту және сала мамандарының жұмыс жағдайын жақсарту жолдары талқыланды.
«Ауыл» партиясы «Таза Ауыл» экологиялық акциясын өткізді
Халықаралық жастар күніне орай «Ауыл» партиясы «Таза Ауыл» экологиялық акциясын ұйымдастырды. Іс-шараға партия төрағасы Қайрат Айтуғанов, Құрылтай депутаттығына кандидаттар, жастар, қоғамдық ұйымдар өкілдері мен партия белсенділері қатысты. Акцияға 350-ден астам адам жиналды.
Қатысушылар бұлақ маңындағы аумақты қоқыстан тазартып, абаттандыру жұмыстарын жүргізді. Сонымен қатар бұлақ көздерін ашу шарасы өткізіліп, табиғи нысанның санитарлық жағдайын жақсартуға бағытталған жұмыстар атқарылды. Қайрат Айтуғанов су көздерін сақтау мен табиғи аумақтарды қорғау мәселесіне тоқталды.
Партия мәліметінше, «Таза Ауыл» акциясы өңірлік филиалдардың бастамасымен еліміздің барлық аймағында өтіп жатыр. Бүгінге дейін республика бойынша 100 акция ұйымдастырылып, елді мекендерді абаттандыру, табиғи аумақтарды сақтау және жастардың экологиялық мәдениетін қалыптастыру жұмыстары жүргізілген.
«Ақ жолдықтар» сусын шығаратын кәсіпорынға барды
«Ақ жол» демократиялық партиясының штабы Павлодардағы «Жана Роса» кәсіпорнына барды. Штаб мүшелері өндірістік цехтарды аралап, азық-түлік және алкогольсіз сусындар шығару үдерісімен танысты.
Кәсіпорында 200-ден астам адам еңбек етеді. Зауыт қазақстандық нарыққа азық-түлік өнімдері мен алкогольсіз сусындар шығарады. Кездесуде кәсіпорынның жұмысы, өндірісті дамыту және жұмыс орындарын сақтау мәселелері талқыланды.
Жиында партия төрағасы Дания Еспаева Құрылтай сайлауына арналған бағдарламаның экономикалық бағыттарын таныстырды. Ол кәсіпкерлікті дамыту, отандық өндірушілерді қолдау, бизнес мүддесін қорғау және экономиканың нақты секторына жағдай жасау жөніндегі ұсыныстарға тоқталды.
Кәсіпорын қызметкерлері өндірістің жағдайына, бизнесті жүргізуге және отандық өнімнің бәсекеге қабілеттілігін арттыруға қатысты сұрақтарын қойып, ұсыныстарын білдірді. Тараптар кәсіпкерлер мен еңбек ұжымдары көтерген мәселелерді шешу жолдары жөнінде пікір алмасты.
Respublica штабы «Кублей» кәсіпорнының ұжымымен жүздесті
Respublica партиясының сайлауалды штабы Оралдағы «Кублей» ет өңдеу кәсіпорнына барды.
Кездесуде зауыттың санитарлық-қорғау аймағындағы тұрғын үй құрылысына байланысты мәселе сөз болды. Санитарлық талаптар кәсіпорын жұмысына кедергі келтіріп, сот даулары бірнеше жылға созылған. Соның салдарынан зауыт сәйкестік сертификаттарынан айырылып, өндірістің тоқтау қаупіне тап болған.
Партия мәліметінше, 2023 жылы оның басшылығы кәсіпорын ұжымымен кездесіп, мәселені жергілікті органдар мен Үкімет өкілдерімен талқылаған. Кейін Денсаулық сақтау министрлігі бұрыннан жұмыс істейтін кәсіпорындардың санитарлық-қорғау аймақтарын қайта қарауға мүмкіндік беретін бұйрық қабылдаған.
Штаб мүшелері ұжымға партия бағдарламасындағы отандық өндірісті қолдау, салық жүктемесін азайту және кәсіпкерлердің құқықтарын қорғауға қатысты ұсыныстарын таныстырды.
