Қол мен аяқтың әркез тоңуы адамның жай ғана суықтағанын білдірмейді. Кейде бұл ағзаның төмен температураға табиғи реакциясы болуы мүмкін. Алайда кейбір жағдайларда аяқ-қолдың үнемі суық болуы қан айналымының бұзылуын немесе белгілі бір аурулардың барын көрсетуі мүмкін, деп хабарлайды turkystan.kz.
Пирогов университетінің сарапшысы Максим Яровойдың айтуынша, қол мен аяқ дененің негізгі бөлігіне қарағанда алшақ орналасқан. Сондықтан белгілі бір жағдайларда бұл мүшелердегі қан айналымы бұзылуы мүмкін.
– Неліктен дәл қол мен аяқ тоңады?
– Адам аяқ-қолының салқындауын әртүрлі жағдайларда сезінуі мүмкін. Қол мен аяқ дененің негізгі бөлігінен алшақ орналасқан мүшелер болғандықтан, белгілі бір жағдайларда олардың қан айналымы бұзылуы ықтимал.
– Қай кезде бұл қауіпті емес?
– Аяқ-қолдың салқындауының себептерін екі топқа бөлуге болады. Ең жиі кездесетін және зиянсыз себептердің бірі – сыртқы факторлардың әсері. Мысалы, адамның салқын бөлмеде немесе далада ұзақ уақыт болуы.
Бұл жағдайда аяқ-қолдың салқындауы шеткері қан тамырларының түйілуіне байланысты болады. Оның мақсаты – қанның негізгі бөлігін маңызды ішкі ағзалардың айналасына шоғырландырып, оларды «тоңып қалудан қорғау».
Мұндай жағдайда адам жылы жерге кіргеннен кейін аяқ-қолы қайтадан жылынады. Алайда суықта ұзақ уақыт болу, соның ішінде ес-түссіз күйде қалу, тек аяқ-қолда ғана емес, бүкіл ағзада қайтымсыз өзгерістерге әкеліп, тіпті өлімге соқтыруы мүмкін.
– Бұған қандай аурулар себеп болуы мүмкін?
– Екінші топқа белгілі бір ауруларға байланысты себептер жатады. Олардың қатарында ревматологиялық аурулар болуы мүмкін. Сондай-ақ Рейно феномені кездеседі. Бұл кезде саусақтардың ұсақ қан тамырларында тромбоз дамып, саусақтардың ұшындағы фалангалар ағарып кетеді.
Сондай-ақ жүрек аурулары, созылмалы жүрек жеткіліксіздігі себеп болуы мүмкін. Аяқтағы варикозды ауру кезінде де аяқ-қолдың салқындау сезімі пайда болады. Бірінші жағдайда бұл жүректің қан айдау қызметінің төмендеуіне, ал екіншісінде веналардың кеңеюіне байланысты.
Қант диабеті және дислипидемия кезінде қан тамырларының тарылуы байқалады. Бұл да аяқ-қолға қанның жеткілікті мөлшерде баруын төмендетеді.
– Қай кезде дәрігерге қаралу керек?
– Осылайша, аяқ-қолдың салқындауы әртүрлі аурулардың маңызды белгісі болуы мүмкін. Сондықтан егер аяқ-қолдың ұзақ уақыт бойы тоңуы жылы бөлмеге кіргеннен немесе ыстық шай ішкеннен кейін де басылмаса, дәрігерге қаралу қажет.
