Жат жерде жүріп ана тілін сақтау – шетелде тұратын қазақ отбасылары үшін өзекті мәселенің бірі. Әсіресе, баланың тілі шығып, айналасын тани бастаған шағында қазақ тіліндегі сапалы әрі қызықты контенттің маңызы арта түспек. Германияның Берлин қаласында жұмыс істейтін қазақстандық бағдарламашы Әділбек Түменбаев пен жұбайы Гүлжаз Мұсылманқұлова да осы мәселемен бетпе-бет келген. Ақырында, олар шетелдегі қазақ балаларының ана тілін ұмытпауына көмектесетін цифрлық жоба жасап шығарды. Бастапқыда ертегілер жинағы ретінде құрылған платформа бүгінде балаларға арналған интерактивті экожүйеге айналған.
Негізгі мамандығы серверлік бағдарламалау саласының аға инженері Әділбек Түменбаев болашақ балаларына қазақ тіліндегі ертегілер мен танымдық материалдар іздей бастайды. Алайда балаларға арналған цифрлық контенттің жеткіліксіз екенін байқап, мәселенің шешімін өздері қолға алуды ұйғарады.
Осылайша, бірге қазақша www.ertegiler.kz: платформасын әзірлеуге кіріседі. Алғашында сайтта тек қазақ ертегілерінің мәтіндері жинақталады. Кейін жоба біртіндеп кеңейіп, қысқаша ертегілер негізінде мультфильмдер жасалып, аудиоертегілер де әзірленген. Ерлі-зайыптылар ертегілерді өздері дыбыстап, балаларға ана тіліндегі шығармаларды тыңдауға мүмкіндік берген.
Бүгінде жоба тек ертегі оқитын сайт емес, балалардың қазақ тілін үйренуіне және ұлттық мәдениетпен танысуына арналған цифрлық ортаға айналған. Платформада ертегі оқуға, аудионұсқаларын тыңдауға, мультфильм көруге, қазақ тілін үйренуге және тіпті ұлттық асық ойынын ойнауға болады.
Жобаның аудиториясы да жыл санап кеңейіп келеді. Әділбектің айтуынша, платформаға ай сайын 60 мыңға жуық отбасы кіреді. Оның 6 мыңы жеке аккаунт ашқан. Сайтта қазақтың танымал ертегілері 100 мыңнан астам рет оқылған. Ал мобильді қосымша бір айдың ішінде мыңнан астам рет жүктелген.
Жоба авторлары соңғы уақытта жасанды интеллект пен цифрлық технологиялардың мүмкіндіктерін пайдаланып, жаңа интерактивті қызмет те іске қосқан. Енді ата-аналар баласының фотосуретін жүктеп, ол туралы мәліметтер енгізу арқылы өз баласы басты кейіпкер болатын шағын ертегі кітабын жасай алады. Бұл баланың кітапқа деген қызығушылығын арттырып қана қоймай, қазақ тіліндегі шығармаларды оқу дағдысын қалыпттастыруға мүмкіндік береді.
Әділбек Түменбаев пен Гүлжаз Мұсылманқұлова алдағы уақытта ертегілердің сапасын жақсартып, жаңа шығармаларды қазақ тіліне аударуды, оларды дыбыстауды және балаларға арналған интерактивті мүмкіндіктерді көбейтуді жоспарлап отыр.
Осылайша, Берлинде тұратын қазақ отбасының өз баласына ана тіліндегі контент іздеуінен басталған бастама бүгінде мыңдаған отбасы пайдаланатын цифрлық жобаға айналды.