286
Швейцариялық банктегі Қазақстаннан заңсыз шығарылған ақша қайтарылады
Швейцариялық банктегі Қазақстаннан заңсыз шығарылған ақша қайтарылады
Елімізден заңсыз шығарылған, бүгінде швейцариялық банкте жатқан 1 млн доллардан астам қаржыны Қазақстанға қайтару бағытында жұмыстар жүргізілуде. Бұл туралы Бас прокуратураның баспасөз қызметі хабарлады.
Бас прокуратура қылмыстық жолмен келген және елден тысқары жерге заңсыз шығарылған мүлікті қайтару бойынша жұмыс нәтижесінде «RothschildBankZurich» швейцарлық банктен 1,3 миллионнан астам АҚШ доллары көлеміндегі ақшалай қаражатты анықтады.
Белгілі болғандай, ақша Мағзұм Абдралиевке тиесілі, ол 2012 жылдан бастап халықаралық іздеуде жүр. Абдралиев «Қорғас ісі» бойынша қылмыстық топтың мүшелері Жақаевқа, Әбдірахмановқа және Құрманалиевке шет елде қаражатты заңдастыруға көмектескені үшін күдікті болды.
"Осыған байланысты, прокурор швейцарлық банктегі ақшалай қаражатты тәркілеу туралы өтінішхатты сотқа жолдады. Биылғы жылдың 29 наурызында Алматы қаласының Алмалы аудандық соты прокурордың өтінішін қанағаттандырды", — делінген хабарламада.
Одан басқа, аталған қылмыстық іс бойынша сотқа дейінгі тергеп-тексеру барысында "ТАТ Кредит" ЖШС-ның кеңсесін тінту кезінде Абдралиевке тиесілі 762 мың АҚШ доллары және 915 мың теңге табылды. Прокуратура қаражатты тәркілеу үшін сотқа тиісті өтініш жолдады.
Нәтижесінде прокуратура органдарының бастамасы бойынша 2,1 миллионнан астам АҚШ доллары мемлекеттің пайдасына тәркіленді.
Баспасөз қызметі атап өткендей, қылмыстық-процестік заңнамаға өзгерістердің енгізілуіне байланысты биылдан бастап үкім шыққанға дейін заңсыз жолмен алынған мүлік тәркілеуге жатады.
