Қасіретті қаңтар оқиғасының астарын ашқан кітап
Онда қаламгердің әріптестері еліміздің басынан өткен қасіретті шақтың аталған туындыда қалай ашылғаны жайында сөйледі.
Алматыда белгілі журналист, Қазақ ПЕН-клубының президенті Бигелді Ғабдуллиннің 2022 жылы елімізде болған Қаңтар оқиғасы жайлы орыс тілінде жазылған «Қаңтар – 22»: неудавшийся госпереворот и пробуждение нации» («Қаңтар–22»: сәтсіз мемлекеттік төңкеріс және ұлттың оянуы») атты кітабының таныстырылымы өтті. Онда қаламгердің әріптестері еліміздің басынан өткен қасіретті шақтың аталған туындыда қалай ашылғаны жайында сөйледі.
Өз кітабы туралы түсініктеме берген Бигелді Ғабдуллин «Менің кітабымда хроника деген нәрсе бар. Әр күні қай облыста қай минутта не болды, соның бәрі бар» деді. Сондай-ақ автор «дүрбелеңді өз көзімен көрген адамдармен жеке сұхбаттасқанын, өзінің жақындарын жоғалтқан адамдармен әңгімелесудің оңай болмағанын» айтты. Біз тұсаукесерден соң Бигелді Ғабдуллинмен кітабы туралы сұрақтар қойдық.
– Бигелді Қайырдосұлы, елімізде екі жылдай уақыт бұрын өткен қасіретті қаңтар оқиғасына байланысты жазған кітабыңыз қазірден бастап оқырмандардың қызығушылығын тудырып жатыр. Бұл кітапты жазуға не түрткі болды?
– Қаңтар туралы көптеген мақала, сұхбат, кітап шығып жатыр. Бірақ шыққан кітаптардың басты кемшілігі – оларда тек Алматы туралы айтылады да, толық, ауқымды географиясы кең камтылмайды
Менің жұмысымның мақсаты – осы оқиғаларды жаңа және кеңірек көзқараспен қарау, оқиғаның жаңа беттерін ашу, өз көздерімен көргендердің ашық айтатын адамдарды тауып сұхбаттасу болды. Сондықтан кітапты жазуға түрткі болған нәрсе – Қантар туралы неғұрлым толық және сенімді кітап жазуға деген ынта болды.
– Қаңтар оқиғасы жайында мемлекет қайраткері Жақсыбек Құлекеев «Қаңтар оқиғасы: Ақорда үшін күрес», ресейлік журналист Леонид Млечиннің «Қаралы Қаңтар. Президент Тоқаев және сабақ алу» атты кітаптары жарық көрді. Сіздің кітабыңыздың аты аталған туындылардан қандай айырмашылығы бар?
– Қаңтар оқиғасы тек қана Алматы мен Астанада емес, көптеген аймақта болғаны мәлім, Сол себептен мен өзімнің зерттеу жұмысымды толыққанды жүргізу үшін Жаңаөзен қаласынан бастап, оншақты облыста болдым, адамдармен сөйлестім. Менің кітабым республикалық деңгейде жазылып отыр.
– Кітабыңызды жазуда халыққа БАҚ арқылы белгілі мәліметтерді шолып талдадыңыз ба, әлде көп жұртқа белгісіз тың деректер тауып, қаңтар оқиғасының астарын аштыңыз ба?
– Менің кітабымда бұрын айтылмаған тың деректер, ақиқаттар көп және Қаңтар оқиғасының астарын көрсеттім.
