АҚШ-тың Нью-Джерси штатында 28 жастағы әйел бұрынғы сүйіктісі мен оның 19 жастағы қызын өлтіруге тапсырыс бермек болды деген күдікке ілінді. Тергеу нұсқасына сәйкес, ол қылмысты орындау үшін 12 мың доллар төлеуге келіскен, деп хабарлайды turkystan.kz.
People басылымының мәліметінше, оқиға 2025 жылдың наурызында басталған. Әйел бұрынғы сүйіктісімен ол шаштараз болып жұмыс істеген кезде танысқан. Қарым-қатынастары аяқталғаннан кейін күдікті ер адам мен оның отбасынан кек алуды жоспарлаған деп көрсетіледі.
Тергеу дерегіне сәйкес, ол Tinder қосымшасы арқылы ер адаммен танысып, екі адамды өлтіру жөнінде ұсыныс жасаған. Бұл үшін 12 мың доллар төлеуге уәде берген. Алайда әйел "киллер" деп ойлаған адам полициямен жасырын түрде ынтымақтасып жүрген ақпарат беруші болып шыққан.
Кейін олар бірнеше күн бойы жоспардың егжей-тегжейін талқылап, хат алмасқан және телефон арқылы сөйлескен.
Сәуір айының басында Глостер-Тауншиптегі дүкендердің бірінің автотұрағында өткен кездесу кезінде күдікті 500 доллар көлемінде алғашқы төлемді қолма-қол берген. Осыдан кейін оны жергілікті полицияның арнайы жасағы ұстаған.
Күдікті Жаклин Д. Диориоға тапсырыспен адам өлтіруді ұйымдастыруға әрекет жасады деген екі эпизод бойынша айып тағылған.
Тергеу мәліметінше, Диорио мен полиция қызметкері 2025 жылғы 6 наурызда біржола ажыраған. Бұған дейін әйел оған қатысты уақытша қорғау ордерін сұрағанымен, кейін өтінішін кері қайтарып алған. Федералдық прокурорлар түпкілікті айыптарды 2026 жылдың қыркүйегінде жариялаған. АҚШ заңнамасына сәйкес, тағылған айыптар дәлелденген жағдайда әйел 20 жылға дейін бас бостандығынан айырылуы мүмкін. Сондай-ақ іс аясында қылмысқа дайындық кезінде пайдаланылған ақша мен мүлікті, соның ішінде 500 доллар көлеміндегі алғашқы төлемді тәркілеу мәселесі қарастырылып жатыр.
