Адам өміріндегі ең жайлы әрі бақытты кезең шамамен 47 жасқа сәйкес келеді. Мұндай қорытынды TePe компаниясының тапсырысымен жүргізілген зерттеу нәтижесінде анықталды, деп хабарлайды turkystan.kz Daily Mail басылымына сілтеме жасап.
Зерттеуге қатысқан 2000-ға жуық респонденттің айтуынша, дәл осы жаста адамдар өз денсаулығына көбірек көңіл бөліп, өмірге деген көзқарасы тұрақтана бастайды. Олар өз ағзасын жақсырақ түсініп, күйзеліске аз ұшырайды әрі тыныш өмір салтын таңдайды.
Маман Miranda Pascucci пікірінше, жас ұлғайған сайын адамның назары сыртқы келбеттен гөрі ішкі саулыққа ауады. Яғни, бастысы қалай көрінетіні емес, өзін қалай сезінетіні мен ағзасының қалай жұмыс істейтіні.
Сауалнама нәтижесіне сәйкес:
– 40 жастан асқандардың шамамен 47%-ы кейінгі жылдары денсаулығы жақсарғанын айтқан
– 32%-ы дұрыс тамақтануға көбірек мән бере бастаған
– 28%-ы бұрынғыдай жиі көңіл көтеріп, алкоголь тұтынбайтынын жеткізген
– 35%-ы басқаларға ұнауға тырысуды азайтып, өз әл-ауқатына басымдық берген
Зерттеушілердің айтуынша, бұл кезеңде адам өмірлік тәжірибе жинап, өз шекарасын анықтайды. Соның арқасында ішкі тепе-теңдік қалыптасады.
Мамандар тағы бір маңызды жайтты атап өтеді: денсаулық пен бақыт кейін келеді деп күтпей, оған апаратын әдеттерді ертерек қалыптастырған дұрыс. Өйткені 47 жас – нәтиже, ал оған апаратын жол әлдеқайда бұрын басталады.
