Ұлттық құраманың және алматылық «Қайрат» клубының қақпашысы Темірлан Анарбеков SofaScore статистикалық порталындағы Чемпиондар лигасында үздік ойыншылар тізімінде көш бастады, деп хабарлайды turkystan.kz.
Рейтинг басында тұрған Анарбековтың көрсеткіші – 8,90. Екінші орында тұрған ПСЖ ойыншысы Дезери Дуэнің рейтинг көрсеткіші – 8,50. Ал әйгілі «Реал» клубының шабуылшысы Килиан Мбаппенікі – 8,33.
Анарбеков кеше «Астана-Аренада» грекиялық «Олимпиакосқа» қарсы өткен ойында алаңға капитан белгісімен шыққан-тын. Командасы грекиялық клубтан 0:1есебімен жеңілгенімен, ойын барысында 8 сейв жасаған Анарбеков УЕФА нұсқасы бойынша кездесудің үздік ойыншысы атағына лайық деп танылды.
