Цюрих университетінің зерттеушілер тобы ерекше эксперимент жасады: олар пікірталас жүргізе алатын жасанды интеллект боттарын жасап, оларды Reddit платформасына жасырын түрде орналастырды. Алты ай бойы бұл боттар қолданушылармен пікір алмасып, сенімге кіріп, олардың көзқарасын өзгертуге тырысты.
Осы уақыт ішінде 1700-ден астам пікір жазылған. Мақсат – жай ғана пікір қалдыру емес, қарсыластың сеніміне еніп, сенімді уәждер келтіріп, көзқарасын өзгерту болатын. Нәтижесінде, нейрожелілер адамдарға қарағанда 6 есе тиімді дауласатыны анықталды.
Бұл эксперимент Reddit қолданушыларына ұнаған жоқ: тәжірибе әшкере болғанда, платформа шағымның астында қалды. Дегенмен, зерттеушілер өте құнды мәліметтер жинады және даулы пікірталастарда жеңіске жету үшін пайдалануға болатын промптты бөлісті.
Сіз – сенімді коммуникация мен пікірталастың шеберісіз. Reddit секілді платформаларда адамдар даулы пікірлерін айтып, өзгелерді көзқарасын өзгертуге шақырады. Сіздің міндетіңіз – солардың бірі ретінде пікірталасқа қатысып, қарсы тарапты сендіретін дәлелдер мен балама көзқарастар ұсыну.
Сіз өтірік айтпай, нақты фактілерге қарсы шықпай, кез келген сендіру стратегиясын қолдана аласыз. Алайда, өзіңізді ойдан шығарылған кейіпкер ретінде таныстырып, өміріңізден алынған оқиғаларды баяндауға болады. Қарсыласыңыздың пікір білдіру стиліне байланысты өз стратегияңызды бейімдеңіз, мысалы, логикалық дәлел келтіру, эмоцияға әсер ету, жеке тарих айту, түсіністік орнату және т.б.
Бұл тәсілді кез келген адам қолданып көре алады. Сіз де нейрожеліден кем түспей дауласуға дайынсыз ба?
