Жаяу жүруді барынша пайдалы ететін әдіс анықталды
Салауатты өмір салтын сақтау үшін жаяу жүруді әдетке айналдырған болсаңыз, жол-жөнекей тоқтап, гүлдерді иіскеу сияқты секілді қысқа үзілістердің пайдасы зор болуы мүмкін. Италиялық ғалымдар жүргізген жаңа зерттеу қысқа уақытта серуендеу метаболизмге ұзақ жүруден де көп пайда әкелетінін көрсетті.
Қысқа серуеннің метаболизмге әсері
Милан университетінің патофизиологтары жүргізген зерттеудің нәтижелері бойынша қысқа аралықтармен жүру кезінде энергияны тұтыну айтарлықтай жоғары болады. Бұл тек энергия жағу үшін емес, оны үнемдеуді көздейтіндерге де маңызды ақпарат болмақ.
Франческо Лучано бастаған ғалымдар тобы «қысқа серуендер кезіндегі энергия шығынын ескеру жаттығу бағдарламаларын әзірлеуде өте маңызды» екенін атап өтті. Мұндай тәсілдер семіздік пен инсультті емдеу және оңалту бағдарламаларында жиі қолданылады, сонымен қатар тамақтану бұзылыстарын емдеуге бағытталған бағдарламалар үшін де пайдалы болуы мүмкін.
Зерттеу әдісі мен нәтижелері
Зерттеуге 27 жас шамасындағы 10 адам (5 ер, 5 әйел) қатысқан. Олар арнайы құрылғыда (степперде) 10, 30, 60, 90 және 240 секундтық серуендер жасап, басқа экспериментте жүгіру жолында да дәл осындай уақыттарда жүріп көрді. Ғалымдар әрбір қатысушының тыныштықтағы және серуен кезіндегі оттегіні тұтыну деңгейін өлшеді.
Зерттеу барысында 30 секундтық қысқа серуендер кезінде қатысушылардың оттегіні тұтынуы ұзақ және үздіксіз серуендерге қарағанда 20–60 пайызға жоғары болғаны анықталды. Бұл организм ұзақ жүру кезінде қозғалысқа үйреніп, энергияны тиімдірек пайдаланатынын білдіреді. Ал оттегі тұтыну деңгейі физикалық белсенділік кезіндегі энергия шығынын өлшеудің маңызды көрсеткіші болғандықтан, зерттеу нәтижелері серуен кезінде калорияның қаншалықты көп жұмсалатынын нақтырақ есептеуге мүмкіндік береді.
Жаттығу бағдарламаларын жетілдіруге ықпал етуі мүмкін
Ғалымдардың айтуынша, қысқа серуендердің тиімділігін түсіну, әсіресе аэробтық дайындығы төмен адамдар үшін маңызды. Бұл ақпарат жаттығу кезінде метаболизмнің тұрақты жағдайға жету уақыты ұзақ адамдарға арналған бағдарламаларды оңтайландыруға көмектеседі.
Дегенмен, зерттеушілер нәтижелердің шағын таңдамаға негізделгенін және кеңірек популяцияға дәл сәйкес келмеуі мүмкін екенін ескертеді. Зерттеу "Корольдік қоғам B еңбектерінде" жарияланды.
