Шымкент базарларында алтын ұрлаумен айналысқан алматылық әйел ұсталды
Қазіргі таңда әйел қамауда.
Шымкент базарларында алтын ұрлаумен айналысқан алматылық әйел ұсталды, деп хабарлады turkystan.kz.
Зергерлік бұйым сатушыларына жарты миллион теңге көлемінде шығын келтірілді. Ол сатып алушы ретінде келіп, бағалы бұйымдарды білдірмей ұрлап, «ізін суытқан».
Тауардың жетіспеушілігін байқаған үш кәсіпкер полицияға арызданды.
«Әл-Фараби АПБ-ның жедел уәкілдері бейнебақылау камераларындағы жазбаларды тексеріп, ұрының жеке басын анықтады. Ол бұрын-сонды ұрлық жасағаны үшін бірнеше рет сотталған Алматы тұрғыны болып шықты. Тәртіп сақшылары оны тұрғылықты жерінен ұстады. Күдікті зергерлік бұйымдарды ломбардқа сатып үлгергені белгілі болды», – делінген Polisia.kz сайтының хабарламасында.
Қазіргі таңда әйел қамауда. Құқық қорғаушылар оның басқа да ұқсас жайттарға қатысы бар болуы мүмкін екенін атап өтті.
Полиция қызметкерлері бағалы заттардың ұрланбауы үшін аса қырағы болу және оларды мүмкіндігінше ұрылардың қолы жетпейтін жерлерде сақтау қажеттігін еске салады.
