Жаңа 2024 ұлу жылында 8 саны кіреді. 2+0+2+4=8. Ұлу жылында 8 саны – нумерологияда ақшаның, карманың саны. Жаңа 2024 жыл – кәсіпкерлікке, ауқымды бизнестерге жол бастайтын жыл. Осы жылы кім шығысқа жол жүреді, сол адам ұтады. Қытай, Малайзия сынды елдермен қарым-қатынас тығыз болса, кәсіпкерлік, сауда, импорт, экспорт дамиды. Онлайн сауда дамиды, табысқа қол жеткізетіндер саны көбейеді.
Естуім бойынша, Мемлекет басшысы 2024 жылды Қазақстандағы Қытай туризім жылы деп жарияламақ екен. Қытайда Қазақстанның туризм жылы болса, өте керемет болар еді.
Бір кемшілігі – 8 санында карма бар. Мәселен, өткен жылы махаббат жылы есігін ашты. Өйткені 7 саны – махаббат саны болатын. Орта жастағылар көп үйленді.
Ал биыл жастар шетелде еңбек етуге, үлкен кәсіп бастауға, ауқымды бизнеске ұмтылып отыр. Жоғарыда айтқан 8 санының кармасына келсек, тарихта бұл жылдары кәмпескелеу көп болған екен. Үкімет бақылау жасап, халық басылып қалмаса екен деп ойлаймын. Өйткені бізде көп адамның сауаты төмендеу, жеке кәсіпкер ретінде тіркелу, оны жүргізу, жабу жағынан түсіндіру жұмыстары жүргізілсе деймін. Осылайша, халық қаржылық сауаттылыққа мән бере бастайды. Сонда декларация да у-шусыз жақсы өтер еді. Үкімет тарапынан кредиттерді кешіру сынды қадамдар болуы мүмкін.
Ұлу жылы өте баяу өтеді. Бұл көп адамның жоспарын жүзеге асыруына, табысының артуына мүмкіндік береді. Мен мұны ұлуға қарап қана айтып отырған жоқпын. Өзім күнтізбеде әр күнді қарап отырамын. Егер жоспармен жүрсек, сол жоспар ылғи да жүзеге асатын болады. Алдағы 2 жыл баяу өтеді. Қазақстанның бірыңғай уақыт белдеуіне көшуі де жайдан-жай емес. Уақыт баяу өткендіктен жылдың әр мезгілінде көктемнің энергетикасы болады. Мәселен, биыл қыс жылы болады. Ақпан айында күн жыли бастайды. Сол себепті экологияда өзгерістер болады. Экологияны күту және төтенше жағдайлар жағына мән беру керек.
Биыл жасанды интеллект, кванттық серпіліс жағынан қатты өзгерістер болады. Сондай-ақ 8 саны демографияға оң әсер етеді, халық саны көбейеді. ЭКО жоспарлап жүрген ата-аналарға жылдың берері бар.
Нумерология бойынша жылды 2-ге бөлуге болады. 2025 жыл өте жақсы, тыныш, жайдары өтеді. Екінші дүниежүзілік соғыс 1945 жылы аяқталғанын ескерсек, көрші елдердегі соғыс бірден тоқтамайды. 2024 жылда 4 саны бар, бұл сан – агрессия. Жылдың жартысына дейін, яғни маусым-шілде айларына дейін агрессия сақталады, ары қарай толқын тынышталады.
Жылдың басты ұраны – жеті рет өлшеп, бір рет кесу немесе асықпай жүріп, аңдап басу. Кім жоспармен, стратегиямен жүріп әрекет етсе, сол адам ұтады. Темпераменті от сияқты адамдар ұтылуы мүмкін. Жоспармен жүру керек деп жатқаным да сондықтан. Өйткені уақыт ақырын өтеді, бәріне үлгереміз, тек асықпау керек. Аяқ асты шешім қабылдап, жоспарын бірден ауыстырғандар қате шешім қабылдауы мүмкін. Одан бөлек, білім беру, көгалдандыру, экология, ландшафтқа көңіл бөлінеді. Әлем халқы экологияға жіті мән беретін болады. 8-дің мәні сәттілікте. Жыл карма жылы. Карма деген тек жағымсыз мағынада айтылмайды. Бұл жерде 8 санының мәні бұрын аянбай еңбек еткен адамдар биыл еңбегінің жемісін жейді. Бағаланбай жүрген жандар, табысқа кенеледі. Яғни, жағымды жағынан өз кармасын алады. Биыл жаңа жылды шулы ортада қарсы алған дұрыс. Өйткені осы жыл көңілді отырыстарды қажет етеді. Ал жылдың басты символы – жасыл ағаш айдаһар. Ол қарқынды дамуды, күш пен энергияны білдіреді.
Арайлым ЖОЛДАСБЕКҚЫЗЫ