Jañalıqtar

Ukraina bizge nota jiberdi

Ukraina Sırtqı ister ministrligi
Qazaqstan Prezidenti Nwrswltan Nazarbaevtıñ Gaagada Ukrainağa qatıstı jasağan
mälimdemesiniñ mazmwnına alañdauşılıq bildirgen nota joldadı. Ayta ketsek, 25
naurız küni Gaagada brifingte Nazarbaev Ukrainadağı ahualğa qatıstı pikirin bildirgen bolatın. Onıñ
aytuınşa, Ukraina üşin saylau ötkizu kerek, ol jağdaydı qwqıqtıq alañğa qayta
äkeluge septigin tigizedi. «Zañdı prezidentti, parlament pen legitimdi ükimetti saylau kerek. Sodan
keyin osı negizde beybit kelissözder jürgizip, qalıptasqan ahualdan birlesip
şığu qajet»,– degen edi
Qazaqstan Prezidenti.

Osığan oray, Ukraina sırtqı
sayasat vedomstvosınıñ Aqparattıq sayasat departamenti direktorı Evgeniy
Perebiynistiñ aytuınşa, Qazaqstannıñ Ukrainadağı elşiliginiñ keñesşi-uäkili
Arğın Ospanov 26 naurız küni Ukraina Sırtqı ister ministrligine şaqırtılğan.
Nazarbaev mälimdemesiniñ halıqaralıq qwqıqtıñ jalpı qalıptasqan normaları men
köp eldiñ poziciyasına qayşı keletini, onıñ eki el arasındağı seriktestik
qatınastarğa kereğar jäne ukrain tarapı üşin qabıldanbaytın jayt ekeni aytıldı.
Alayda, Qazaqstan Sırtı ister ministrligi
 
Ukrainanıñ notasın tüsine almaytının
jetkizdi.  

«Ukraina Sırtqı ister
ministrliginiñ notasın biz tüsine almadıq. Negizi ol parasattı mağınada emes,
köp jağdayda emociyamen jazılğan sekildi bolıp körindi», – dedi baspasöz mäslihatında
QR sırtqı sayasat vedomstvosınıñ resmi ökili Janbolat Üsenov. Sonday-aq ol
Qazaqstan Ukrainadağı dağdarısqa qatıstı salmaqtı jäne şınayı wstanımda ekenin ayta
kele, “Elbası Nwrswltan Nazarbaev bir emes, birneşe ret, tipti Gaagadağı
sammitte de, barlıq taraptardıñ Ukrainadağı dağdarıstı  beybit
kelissözder arqılı şeşuine şaqırdı. Sondıqtan biz atalğan mälimdemelerge
ukrainalıq taraptı alañdatatın negiz körip otırğan joqpız», – dedi Janbolat
Üsenov.

Resmi ökildiñ aytuına qarağanda, bügin Ukrainanıñ uaqıtşa
senimdi ökili QR SİM-ne şaqırılıp, elimizdiñ ukrainalıq dağdarısqa qatıstı
wstanımı tağı bir märte tüsindiriletin boladı. «Atalğan notağa jazbaşa jauap berudi
josparlap otırğan joqpız», – degendi jetkizdi. Alayda, mwnı Ukraina tarapı qalay qabıldaytını belgisiz.

Dinara Dürmän 

Back to top button