Түнде тым жылы бөлмеде ұйықтау адамның келесі күнгі зейіні мен жұмыс өнімділігіне әсер етуі мүмкін. Аустрияда жүргізілген зерттеу жатын бөлмедегі температураның небәрі 1°C-қа көтерілуінің өзі ұйқы сапасының нашарлауымен және келесі күні адамның өзін азырақ өнімді сезінуімен байланысты екенін көрсетті, деп хабарлайды turkystan.kz.
Ғалымдар 82 адамның ұйқысын екі-үш апта бойы бақылап, барлығы 1189 түннің дерегін талдаған. Зерттеу 2025 жылдың шілде-тамыз айларында жүргізілген.
Қатысушылар Oura Ring смарт сақинасын тағып ұйықтаған. Құрылғы олардың ұйқы сапасын, ұзақтығын және түнгі тынығу ерекшеліктерін тіркеген. Ал жатын бөлмелерге орнатылған арнайы датчиктер ауа температурасы, ылғалдылық пен көмірқышқыл газының мөлшерін өлшеген.
Бір қызығы, зерттеу кезінде бөлмелердегі орташа температура 24°C болған. Яғни ғалымдар тек аптап ыстықтың емес, әдеттегі бөлме температурасының аздап өзгеруінің де әсерін байқаған.
Нәтижесінде адамның жатын бөлмесі өзіне үйреншікті температурадан 1°C жылы болған түндері ұйқы сапасының көрсеткіші орта есеппен 0,5 балға төмендеген. Бұл көрсеткіш 100 балдық жүйемен бағаланған.
Ал келесі күні қатысушылар өздерінің зейіні мен өнімділігін бес балдық шкала бойынша сәл төмен бағалаған. Температураның әр қосымша градусы шамамен 0,04 балдық төмендеумен байланысты болған.
Зерттеушілердің айтуынша, жылы бөлмеде ұйықтаған адамдар түнде жиірек мазасызданып, таңертең өздерін ұйқысы қанбағандай сезінген. Бұл олардың күндізгі сергектігіне де әсер етуі мүмкін.
Дегенмен ғалымдар бөлме температурасының көтерілуі адамның ойлау қабілетін тікелей нашарлататынын дәлелдеген жоқ. Өйткені қатысушылардың нақты жұмыс нәтижесі емес, өздерін қаншалықты өнімді сезінетіні бағаланған. Байқалған айырмашылық та салыстырмалы түрде шағын болған.
Зерттеу авторлары әсіресе жаз айларында жатын бөлмені салқын ұстауға назар аударуға кеңес береді. Олардың пікірінше, түнгі температураны реттеу ұйқы сапасын жақсартудың және күндізгі сергектікті сақтаудың қарапайым жолдарының бірі болуы мүмкін.
