23 шілдеде Орталық сайлау комиссиясының оныншы отырысы өтті. Жиында 23 тамызда өтетін Құрылтай депутаттарын сайлауға қатысатын партия тізімдерін тіркеу қорытындыланды, деп хабарлайды turkystan.kz.
ОСК мәліметінше, сайлауға қатысатын 7 саяси партияның тізіміне барлығы 545 кандидат енген. Құрылтайдағы депутат мандатының саны – 145. Кандидаттардың 172-сі – әйел, 373-і – ер адам. Әйелдердің үлесі – 31,56 пайыз. Сонымен қатар 35 жасқа дейінгі 74 кандидат бар. Кандидаттардың орташа жасы – 45,4 жас.
Орталық сайлау комиссиясының хатшысы Шавхат Өтемісов барлық партия әйелдер, жастар және мүгедектігі бар адамдардың өкілдігіне қойылатын заң талаптарын сақтағанын хабарлады.
– 7 саяси партияның тізіміндегі әйелдер, жастар және мүгедектігі бар адамдардың жалпы үлесі – 43,9 пайыз, – деді ол.
Жиында саяси партиялардың сайлау бюллетеніндегі орналасу реті де жеребе арқылы анықталды. Дауыс беру парағында партиялар мынадай ретпен көрсетіледі: «Әділет» партиясы, Жалпыұлттық социал-демократиялық партия, «Байтақ» жасылдар партиясы, Қазақстан Халық партиясы, «Ауыл» партиясы, «Ақ жол» демократиялық партиясы және Respublica партиясы.
Сайлау науқанына халықаралық бақылаушылар да қатысады. 23 шілдедегі жағдай бойынша ОСК 12 мемлекет пен бес халықаралық ұйымнан 86 бақылаушыны тіркеген. Бақылаушыларды тіркеу 17 тамызға дейін жалғасады.
Өңірлерде үгіт материалдарын орналастыру үшін 8 мыңнан астам орын, ал сайлаушылармен кездесу өткізу үшін шамамен 4,5 мың ғимарат пен алаң дайындалған.
ОСК төрағасы Нұрлан Әбдіров жергілікті атқарушы органдар барлық саяси партияға тең жағдай жасауға міндетті екенін атап өтті.
Сайлау заңнамасына бірқатар жаңа талап енгізілген. Дауыс беру күні толтырылған бюллетеньді фотоға немесе бейнежазбаға түсіруге және оны таратуға тыйым салынады. Сондай-ақ осы сайлау науқаны үшін арнайы әзірленбеген үгіт-насихат материалдарын таратуға болмайды.
ОСК мүшесі Ләззат Сүйіндік дауыс беру күні және оның алдындағы күні үгіт-насихат жұмысын жүргізуге тыйым салынатынын еске салды. Бұдан бөлек, сайлауға 5 күн қалғанда сауалнама нәтижелерін, болжамдар мен партияларды қолдауға арналған дауыс беру қорытындыларын жариялауға болмайды.
Нұрлан Әбдіров партиялар мен кандидаттарды сайлау заңнамасын қатаң сақтауға шақырды.
– Үгіт жүргізу тәртібі бұзылған жағдайда сайлау комиссиясы кандидатты тіркеу туралы шешімнің күшін жоюы мүмкін, – деді ОСК төрағасы.
