LRT: әуежай мен вокзал аралығы – 40 минут

Осы демалыс күндері Астана LRT жолаушылар тасымалы іске қосылады. Жақында City Transportation Systems компаниясы журналистерге пресс-тур ұйымдастырып, жеңіл рельсті көлік жүйесінің жұмысын таныстырды.

Жиын барысында компаниясының бас­­қарма төрағасы Асылбек Дүйсебаев енді әуе­жайдан вокзалға дейін 40 минутта же­туге болатынын айтты. 

– Жоба 2016 жылы бекітілді, құны 1,8 мил­лиард АҚШ долларын құрайды. Осы уа­қытқа дейін бұл сома өзгерген жоқ. Тех­ни­калық сипаттамасы жасақталып, пойыз­дардың моделі мен дизайны өзгертілді. Сондай-ақ LRT жүйесі бойынша абаттан­дыру жұмыстары жүргізілді. Шу деңгейін тө­мендету үшін вагондардың қабыр­ға­ла­рын қалыңдаттық. Сонымен қатар жеңіл ре­льсті құрылым пайдаланылды. Жақын орналасқан тұрғын үйлерге вибрациялық әсері болмайды, – деп түсіндірді басқарма төра­ғасы. 

LRT толықтай автоматтандырылған жүйе­мен басқарылады, яғни жүргізушісіз қа­тынайды. Желінің жалпы ұзындығы – 22,4 шақырым.
Қазір LRT стансаларында соңғы дайын­дық кезеңі жүріп жатыр, пойыздарды сы­нақ­тан өткізу, қауіпсіздік жүйелерін тек­серу және инфрақұрылымды баптау жұ­мыс­тары сәтті өтті.
Сынақ кезеңі былтыр қыркүйекте бас­тал­ған болатын. Әуелде оның мерзімі алты ай­ға созылады деп хабарланғанымен ұзақ­тығы сегіз айға созылды. CTS компаниясы пойыздар 40-50 км/сағ жылдамдықпен жү­ре­тінін, «Нұрлы жол» стансасынан әуе­жайға дейінгі жол шамамен 40 минутты ала­тынын мәлімдеген-ді. Ал қозғалыс ара­лығы учаскеге байланысты 5-10 минут бо­латыны хабарланды.

LRT бағыты елорданың негізгі нүк­те­ле­рін байланыстырады. Желінің бастапқы аял­дамасы – халықаралық әуежай. Мұнда пойыздарға қызмет көрсетуге арналған депо салынған. Ал соңғы нүктесі – «Нұрлы жол» вокзалы. Барлығы 18 станса бар. Олар қаланың негізгі іскерлік орталықтары мен тұрғын-үй аудандарын қамтиды. LRT жо­лақы картасының бағасы – 1 000 тг.  Жол ақы­сы – 200 теңге. 7 жастан 18 жасқа дейін­­гі оқушылар мен заңнамаға сәйкес жеңіл­дік санатына жататын азаматтар үшін жол жүру тегін. 

LRT жүйесінде жолаушыларға ыңғайлы бір­неше төлем тәсілі бар. Жол ақысын Face­Pay, банк карталары, Apple Pay, Samsung Pay, QR-код және арнайы көлік картасы арқы­лы төлеуге мүмкіндік бар. Бір реттік билет­терді стансадағы кассалардан немесе TVM автоматтары арқылы сатып алуға болады. Пойыз таңғы сағат 06:00-дан кешкі сағат 23:00-ге дейін жүреді. 

– Басты міндетіміз – жол ережелерін сақтап, жолаушылардың қауіпсіздігін қам­та­масыз ету. Бұл да метроның ере­желерімен бір­дей. Есіктер жабылатын кезде ескерту дабылы қағылады. Сол уақытқа дейін ішке кіріп үлгеруі керек және тоқтаған кезде де дыбыс берілгенде шығып үлгеруі керек. Бір сос­тавта 4 вагон, онда барлығы 652 адамға шақ­талған орын бар, – деді LRT жеңіл көлік рель­сінің операторы Айдар Надырбеков. 

Алдағы уақытта желіні Қосшы қала­сы­на дейін ұзарту жоспарланып отыр. Жо­ба­ның екінші кезеңіне дайындық басталып кетті. Жуырда жаңа эстакада учаскесіне ал­ғашқы темірбетон арқалық құйылды.
LRT жүйесінің жұмысына 1000-нан астам адам тартылған. Оның 300-і – шетел­дік мамандар. Бұдан бөлек, 500-ге жуық қызметкер арнайы даярлықтан өткен. Олардың қатарында пойыз операторлары, диспетчерлер мен техникалық мамандар бар. Сондай-ақ салаға қажетті кадрларды жүйелі даярлау үшін арнайы оқыту бағдар­ламаларын іске қосу жоспарланып отыр.