Адамның қанша жасайтыны шамамен 50 пайыз жағдайда генетикаға тәуелді. Бұған дейін тұқым қуалаудың рөлі төмен бағаланып келген, себебі соғыстар, індеттер мен жазатайым оқиғалар сияқты сыртқы факторлар нақты картинаны бүркемелеп келген. Бұл туралы Science ғылыми журналында жарияланған жаңа зерттеуде айтылды, деп хабарлайды turkystan.kz.
Зерттеу Копенгаген университетінің ғалымдарының қатысуымен жүргізілген. Ғалымдар егіздер туралы ірі деректер базасын талдап, егер өлімнің сыртқы себептерін, нақтырақ айтқанда, апаттар, жарақаттар, жұқпалы аурулар және басқа да кездейсоқ факторларды есептен алып тастаса, ата-анадан балаға берілетін ұзақ өмір сүру қабілетінің үлесі 50 пайызға дейін жететінін анықтаған.
Зерттеу авторларының түсіндіруінше, тарихта адамдардың көпшілігі биологиялық қартаюдан емес, соғыс, эпидемия немесе тұрмыстық оқиғалар салдарынан көз жұмған. Мұндай «сыртқы өлім» гендердің шынайы әсерін статистикалық тұрғыда көлеңкеде қалдырған. Ал бұл факторларды алып тастағанда, гендер ағзаның біртіндеп әлсіреуіне байланысты өлім-жітімге шешуші ықпал ететіні байқалады. Дәл осы процесс нақты қартаю механизмін көрсетеді.
Бұған дейінгі көптеген зерттеулерде генетиканың өмір ұзақтығына әсері мардымсыз деген қорытынды жасалған. Алайда жаңа әдіс бұл нәтиженің есептеу тәсіліне байланысты шыққанын көрсетті.
