Қоғам тыныштығы – көзге көрінбейтін ерліктің нәтижесі. Күнделікті өмірде біз қалыпты тіршілік кешіп жүрген сәтте, ел ішінде қауіптің алдын алып, азаматтардың өмірі мен құқығын қорғау жолында полиция қызметкерлері тәулік бойы қызмет атқарады. Қылмысқа қарсы тұру, төтенше жағдайларда адам өмірін арашалау, қоғамдық тәртіпті сақтау – үлкен жауапкершілік пен жанқиярлықты талап ететін қызмет.
Алайда қоғамда тәртіп сақшыларына деген көзқарас біркелкі емес. Кейбір келеңсіз оқиғалар мен сенімге сызат түсірген әрекеттер салдарынан халықтың полицияға сенімсіздігі әлі де бар екені жасырын емес. Бұл – бүгінгі қоғамның шындығы. Дегенмен көпшілік назарынан тыс қалып жатқан, қызмет барысында ерлігімен көзге түскен полиция қызметкерлерінің адал еңбегі мен батырлық істері жетерлік. Қызметтік міндетін орындау барысында батылдығымен көзге түскен полицейлердің еңбегін еш терістей алмаймыз. Өзгенің өмірі үшін өз басын бәйгеге тіккен, ерлікпен қаза тапқан, адамдарды ажалдан құтқарған полицейлердің мысалы мыңдап саналады.
Кейде нағыз батырлар арамызда жүреді. Олар өз міндетін адал атқарады. Қостанай облысы Ұзынкөл ауданындағы учаскелік полиция инспекторы Арман Райымбеков сақырлаған аязды кеште дәл осылай әрекет етті.
9 желтоқсан күні кешкісін Троебратское ауылы қатты дүрлікті. Учаскелік полицияға хабарласқан әйел 75 жастағы әкесі Николай Хавревтің таңертең балық аулауға кеткеннен әлі оралмағанын айтады.
Арман Райымбеков ол кісіні жақсы танитын. Зейнеткер бұған дейін де бір рет адасып кеткен болатын. Ал бұл жолы әр минут қауіпті еді. Өйткені далада үскірік аяз бен өткір жел соғып тұрған.
Николай ақсақалдың жоғалып кеткені туралы әңгіме ауыл арасында лезде тарап, көрші-қолаң мен таныстары іздеуге кірісіп кетті.
Инспектор дереу жедел-жәрдем шақырып, балықшының қызымен және ауылдастарымен бірге көлге бет алды. Қараңғылық қоюланған сайын адам бойынан асатын, мұз құрсаған қамыстар арасынан өту қиынға соқты. Аяз бетті қарып, суық сүйектен өтеді. Адамдар тоңа бастағанда, Арман бәріне кері қайтып, үйлеріне барып жылынып отыруды ұсынды. Ал өзі іздеуді ары қарай жалғастыра береді. Бұл кезде іздеу жұмыстарының жалғасып жатқанына 3 сағаттан асқан еді.
– Мен де тоңдым. Бірақ шананың ізін көргенде, оның осы маңда, қамыстардың арасында екенін түсіндім. Қардың үстінде тапталған жерлер оның демалып, қайтадан ары қарай жүре бергенін көрсетіп тұрды. Демек, соңынан бару керек, – дейді ол.
Арман көл үстіндегі мұзды жаяу кесіп өтті. Іздеп жүргеніне тағы да үш жарым сағат өтті. Кенет ауылға жақын жерден ақ қардың үстінде қара дақ көзге шалынды. Жүгіріп жеткен инспектор әбден тоңған, өмір мен өлім арасында, ес-түссіз жатқан қарт балықшыны көрді. Аяғы электр сымдарына шырмалып, оны өзі босата алмай, әбден титықтапты. Инспектор балықшының аяғын сым құрсаудан босатып, таяу маңда күтіп тұрған жедел жәрдемге дейін жеткізіп, ауруханаға алып кетті.
– Науқас өте ауыр жағдайда келіп түсті. Дереу ауруханаға жатқызып, мамандарымыз қарады. Егер сәл кешіккенде, аман алып қала алмас едік, – деп еске алады Ұзынкөл аудандық ауруханасының меңгерушісі Алиса Бондуровская.
Ақсақалдың жағдайын білуге келген Арманды көргенде балықшының қызы көз жасын тыя алмады.
– Егер сіздің жедел әрекетіңіз бен табандылығыңыз болмаса, әкем қазір тірі отырмас еді, – деді ол учаскелік инспекторды құшақтап.
Оның айтуынша, әкесі өте белсенді адам. Жазда саңырауқұлақ тереді, қыста балық аулайды. Бес жыл бұрын да ауылдан 20 шақырым жерде адасып кеткен екен. Ол кезде де аман-есен табылып бір қуантқан.
Іздеуге қатысқан ауыл тұрғыны Сергей Пышный:
– Арман өз ісін өте жақсы біледі. Әрдайым адамдармен бірге, үнемі байланыста, тез әрекет етеді. Оған әрқашан сенім артуға болады. Нағыз кәсіби маман, – дейді.
Арман Райымбеков полицияда ұзақ жыл қызмет етіп келеді. Үлгілі отбасы, үш бала тәрбиелеп отыр. Ауылда оны танымайтын жан жоқ әрі кез келген істе адамдарға қол ұшын созуға дайын тұрады.
Бүкіл ауыл болып аязды түнде мұз құрсауында қалған балықшыны жеті сағат іздеген инспектордың жанкештілігі мен ауыл тұрғындарының ауызбіршілігі көпке үлгі. Иә, бір адамның өмірін құтқару үшін кейде бейжай қарамаудың өзі де жеткілікті.
Осындай сәттерде өз қауіпсіздігін кейінге ысырып, өзгенің өмірі үшін тәуекелге баратын полиция қызметкерлерінің ерлігі – нағыз азаматтық пен батырлықтың үлгісі. Бұл ерліктер бір сәттік әрекет емес, антқа адалдықтың, мамандыққа шынайы берілгендіктің айғағы.
Иә, адам тағдырына бейжай қарамайтын адал полицейлер арамызда аз емес. Бірінші кейіпкеріміз қағаздағы «суицидтің» тасасында қалған қылмысты ашып, әділ үкімге жол ашса, екіншісі аязды түнде мұз құрсауында қалған жанды ажалдан арашалап қалады, үшіншісі ең ауыр қылмыстардың шындығын дәлелмен сөйлетіп, қылмыскерді заң алдында жауапқа тартады. Өз қауіпсіздігін кейінге ысырып, өзгенің өмірі үшін тәуекелге баратын осындай азаматтардың әрекеті – мамандыққа адалдықтың, антқа беріктіктің айқын дәлелі. Сондай-ақ полиция қызметкерінің ар-ұяты, кәсіби табандылығы мен селқоя қарамауы. Олардың ерлігі тек бір адамның өмірін құтқарумен шектелмейді, ол – қоғам мен полиция арасындағы сенімді нығайтуға жасалған нақты қадам.
