Республика күні қарсаңында Ақтөбе облысының екі ауданындағы бірнеше ауылға көгілдір отын берілді.
Былтыр өңірде тұрғындарды газбен қамту көрсеткіші 95,7 пайызға жеткен болатын. Биыл 28 ауылды газдандыру арқылы бұл көрсеткішті 96,8 пайызға дейін жеткізу жоспарлануда.
Бұл – Ақтөбе облысында бұрын-соңды болмаған көрсеткіш.
Нақты жүзеге асқан жұмыстар нәтижесінде Мұғалжар ауданының Ащысай ауылдық округіне қарасты Ащысай мен Сабындыкөл ауылдарына газ берілді. Бұл қуанышты ауыл тұрғындары көп жыл күткен
еді.
Жаңа инфрақұрылымның іске қосылуының арқасында енді Ащысай ауылындағы 71 үй мен 334 тұрғын және Сабындыкөл ауылындағы 23 үй мен 108 тұрғын, сондай-ақ әлеуметтік нысандар – мектеп, балабақша, медициналық пункт көгілдір отынмен қамтылмақ. Осылайша, ауданның газбен қамту үлесі 97,7 пайызға жетті.
Тапсырыс беруші – Ақтөбе облысының энергетика және тұрғын үй-коммуналдық шаруашылығы басқармасы, ал мердігер мекеме – «Әлихан ойл-3» ЖШС. Мердігер мекеме жалпы ұзындығы 39,5 шақырымдық газ желісін тарту бойынша жұмыс жүргізді.
Екі ауылда көгілдір отынға қосылу салтанатты шарасы өтіп, оған Мұғалжар ауданының әкімі Дархан Ермағанбетов, Ақтөбе облыстық энергетика және тұрғын-үй коммуналдық шаруашылығы басқармасының басшысы Арысұлан Айтбаев, QazaqGasAimaq АҚ Ақтөбе облыстық филиалы Мұғалжар ауданының газ шаруашылығының өкілдері қатысып, ауыл тұрғындарын қуанышымен құттықтады.
Ауылға газдың келуі – елді мекендердің дамуына, тұрғындардың өмір сүру деңгейін жақсартуға бағытталған мемлекеттік саясаттың нақты нәтижесі. Аудан әкімі бұл бағыттағы жұмыстар алдағы уақытта да жалғасатынын жеткізді.
Ақтөбе облысының Әйтеке би ауданындағы Әйке және Тереңсай ауылдары да газбен қамтылды. Енді екі елді мекеннің тұрғындары көгілдір отынның игілігін көреді.
Бүгінде Әйке ауылында 176 аулада 906 тұрғын, ал Тереңсай ауылында 153 аулада 776 тұрғын тұрады. Бұған дейін бұл ауылдар орталықтандырылған ауызсумен қамтылған болса, енді газға да қол жеткізіп отыр.
«Ақтөбе облысы Әйтеке би ауданы Әйке және Тереңсай ауылдарында газ тарту және ауылішілік газ құбырын салу» жобасы аясында жүзеге асырылған игілікті істі жүзеге асырған мердігер ұйым – «Ерзат» ЖШС. Газ құбырының жалпы ұзындығы – 26,3 шақырым.
Газ беру рәсіміне Әйтеке би ауданының әкімі Дәулетияр Тоғызбаев, Ақтөбе облыстық энергетика және тұрғын үй-коммуналдық шаруашылығы басқарма басшысының орынбасары Серік Дәулетов, ауыл ақсақалдары мен тұрғындар қатысты.
Аудан әкімдігінің мәліметінше, жыл соңына дейін Әйтеке би ауданына қарасты Қияқты және Ұлғайсын ауылдары да газбен қамтылады. Осылайша, бұл ауданда көгілдір отынға қосылған елді мекендер саны 18-ге (66,6%) жетіп, 18 мыңнан астам тұрғын немесе аудан халқының 87,5%-ы көгілдір отынды пайдалана алады.
Бұл жобалар ауылдардың әлеуметтік-экономикалық дамуына серпін беріп, тұрғындардың өмір сапасын арттыруға бағытталған.
Данагүл ҚАЗИХАН,
Ақтөбе облысы
