Астанадағы «Жастар» саябағында қалалық Жастар саясаты мәселелері басқармасының ұйымдастыруымен және «Жасыл ел» жобасына қатысушы белсенділердің қолдауымен «Таза Қазақстан» жалпыұлттық бастамасы аясында экологиялық іс-шара өтті.
Шараның мақсаты – елорданың экологиялық ахуалын жақсарту, қоғамдық орындардың тазалығын сақтау, сондай-ақ әр тұрғынды өз ауласындағы тәртіп пен тазалыққа жауапкершілікпен қарауға үндеу.
Экологиялық акцияға Астана қаласы мәслихатының төрағасы Табиғат Зейнұлқабден қатысып, «Жасыл ел» жобасының қатысушыларына ризашылығын білдірді.
– Қоршаған ортаны қорғау – әрқайсымыздың азаматтық борышымыз. Қазір «Жасыл ел» жобасына еліміздің барлық аймағынан жастар белсенді қатысып жатыр. Астаналық қатысушылар мамыр айынан бастап түрлі экологиялық бастамаларға және қаланы көгалдандыру жұмыстарына белсене атсалысуда. Бүгінге дейін бірнеше жаңа саябақ пен гүлзар ашылды. Алайда оларды таза ұстау мен күтімін үздіксіз жүргізу қажет. Бұл бағытта жастардың үлесі зор, – деді Табиғат Зейнұлқабден.
Іс-шара барысында мәслихат төрағасы жастармен бірге жасыл желектерді суарып, кейін бейресми кездесу ұйымдастырылды. Кездесуде «Жасыл ел» жастары өз сауалдарын қойып, келесі жылы жобаға қатысушылар санын көбейтуді ұсынды. Сонымен қатар саябақта Абай Құнанбайұлының туған күніне орай жастар арасында кітап алмасу акциясы өтті.
Айта кетейік, биыл «Жасыл ел» еңбек жасақтарының XXI маусымы өтіп жатыр. Осы жоба аясында елордада 14 пен 35 жас аралығындағы 5 200-ден астам жас жұмыспен қамтылған. Олар құрылыс нысандары мен қала саябақтарын, әлеуметтік мекемелер мен білім беру ұйымдарының маңын, көгалдандыру мен тазалық шараларына белсенді түрде қатысып келеді.
