Болашақ мамандардың кәсіби шеберлігін ұштаған WorldSkills Astana-2025 қалалық чемпионаты өз мәресіне жетті. Бұл байқау жұмысшы мамандықтардың қоғамдағы маңызын арттырып, жастар арасында олардың беделін көтеруді мақсат етеді. Биылғы чемпионатқа 350 үміткер қатысып, түрлі бағыттар бойынша сынға түсті, 50 үздік маман анықталды. Тәжірибе мен теорияны ұштастыра отырып, жас мамандар өздерінің біліктілігін, кәсіби қабілеттерін паш етті. Олардың ішінде үздік шыққандары алтын, күміс медальдармен марапатталды. Жүлдегерлер республикалық деңгейде ел намысын қорғайтын болады.
Кәсіптік-техникалық білім беру – экономиканың қозғаушы күші. WorldSkills чемпионаты тек жарыс емес, сонымен қатар кәсіби бағыт-бағдар, шеберлікті дамыту алаңы ретінде де өз тиімділігін дәлелдеп отыр. Студенттер аспаздық, веб-технологиялар, графикалық дизайн, мобильді робототехника, IT, инженерлік графика, мейрамхана сервисі және басқа да сұранысқа ие мамандықтар бойынша өз жобаларын ұсынып, бақ сынады.
Чемпионатта ерекше көзге түскендердің бірі – Астана қаласы әкімдігінің қоғамдық тамақтандыру және сервис колледжі. Бұл оқу орны WorldSkills қозғалысына белсенді қатысып, бірнеше жыл қатарынан жүлделі орындарды иеленіп жүр.
Зәуре ҚЫЛЫШБАЕВА,
Астана қаласы әкімдігінің қоғамдық тамақтандыру және сервис колледжінің директоры:
– Кондитерлік ісі бойынша біз қатарынан 3 жыл бойы Республикада алтын медаль иелендік. Ал аспаздық бағытта соңғы төрт жыл ішінде 1-2-орын алдық. Наубайшы мамандығы бойынша да жетістіктеріміз бар. Жалпы, бұл скилс қозғалысының басты мақсаты – жұмысшы мамандықтардың жастар үшін қаншалықты маңызды әрі қызықты екенін көрсету және осы мамандықтарды насихаттау.
Байқауда техникалық бағыттағы студенттердің де белсенділігі жоғары болды. Солардың бірі – 18 жастағы Аллажар Хамитов. Ол Астана қаласындағы Құрылыс-техникалық колледжінің студенті. Аллажар чемпионатта автоматтандырылған шлагбаум жүйесін жасап, 1-орын иеленді. Бұл жоба – күзетшіні қажет етпейтін, компьютер арқылы басқарылатын құрылғы.
Чемпионат әділ бағалануы үшін арнайы сарапшылар тобы жұмыс істеді. Олардың қатарында колледждердің тәжірибелі ұстаздары, арнайы сертификаты бар эксперттер, сондай-ақ тәуелсіз сарапшылар бар. Астана қаласы Білім бөлімі басқармасының өкілі Ақмарал Хон байқаудың әділдігіне тоқтала келе былай деді: «Жұмыстарды бағалап отырған 250 сарапшы бар. Олардың қатарында колледж оқытушылары да, сонымен бірге, бас сарапшылар да жұмыс істейді. Бас сарапшылардың арнайы сертификаттары бар. Бұған қоса, біз басқа өңірлерден де тәуелсіз сарапшыларды арнайы шақырдық».
WorldSkills чемпионатына қатысқан колледж түлектерінің 97 пайызы өз мамандықтары бойынша тұрақты жұмысқа орналасады. Бұл – техникалық және кәсіптік білім беру жүйесінің тиімділігін айқындайтын маңызды көрсеткіш. Қазір елімізде білікті жұмысшыларға сұраныс артып келеді. Бұл чемпионат – сол сұранысты сапалы кадрлармен қамтамасыз етудің бірден-бір жолы.
WorldSkills қозғалысы соңғы онжылдықта елімізде тұрақты түрде өтіп келеді және оның басты мақсаты – жұмысшы мамандықтардың беделін арттыру, жастардың кәсіби бағытта дамуына мүмкіндік жасау. Қалалық деңгейде басталған чемпионаттың жеңімпаздары алдағы уақытта Ұлттық чемпионатта ел намысын қорғайтын болады.
Жанасыл ЗАЙТИМХАН
