Жаңа зерттеу жұмыста қызметкерлердің ұйқы сапасы мен олардың мінезінің "көлеңкелі" тұстарын көрсетуі арасында байланыс барын көрсетті. Journal of Organizational Behavior журналында жарияланған зерттеу нәтижесінде ұйқысы нашар өткен күндері адамдар нарциссизм, макиавеллизм және психопатия белгілерін көбірек көрсететіні анықталған, деп хабарлайды turkystan.kz
Мұндай мінездің бір себебі – эмоциялық күйзеліске деген төзімділіктің төмендеуі, яғни ұйқы – жұмыс орнындағы "уытты" мінез-құлыққа ықпал ететін, бұрын еленбеген фактор ретінде танылып отыр.
Ғылыми тілде «қараңғы үштік» (dark triad) деп аталатын бұл қасиеттер — нарциссизм, психопатия және макиавеллизм – ұзақ уақыт бойы жұмыс орнындағы зиянды мінез-құлықпен және деструктивті қатынастармен байланысты деп саналса да, олар көбінесе тұрақты сипат ретінде зерттеліп келді. Ал бұл жаңа зерттеу олардың күнделікті өзгермелі күйіне назар аударады және күнделікті факторлар, мысалы, ұйқы сапасы мен ұзақтығы осы күйге қалай әсер ететінін талдайды.
«Біз бәрімізде белгілі бір дәрежеде қараңғы тұлғалық белгілер бар екенін түсінуден осы зерттеуге қызығушылық пайда болды. Әсіресе, беделді қызметтегі адамдарда бұл қасиеттер жиі байқалады», — дейді зерттеу авторы, Vrije Universiteit Brussel университетінің постдокторанты Эви Кёйперс.
«Мұндай қасиеттерді анықтау маңызды, бірақ олардың өзгермелі екенін түсіну одан да маңызды. Белгілі бір жағдайлар бұл мінездерді уақытша күшейтіп жіберуі мүмкін, біз соны зерттегіміз келді. Осы түсінік арқылы олардың тұрақты мінезге айналуын болдырмау жолдарын табуға болады деп үміттенеміз», — дейді ол.
Зерттеуге Бельгия мен Аргентинадан 103 жұмыс істейтін ересек адам қатысты. Оларға он күн бойы күніне екі сауалнама толтыру ұсынылды. Таңертеңгі сауалнамада қатысушылар ұйқы сапасы мен ұзақтығын бағаласа, кешкісінде күн бойғы өз мінез-құлқын, соның ішінде нарциссизм, макиавеллизм, психопатия және эмоциялық күйзеліс жағдайындағы төзімділігін сипаттады.
Зерттеу нәтижесі көрсеткендей, нашар ұйқы тек шаршау немесе өнімділіктің төмендеуімен ғана емес, адамның басқаларға деген қатынасына және мінез-құлық этикасына да ықпал ете алады.
