«Көмір алып бара жатқан әйел» деп аталатын бұл картина шамамен 1626 жылы салынған.
Суретші Питер Брейгельдің 1974 жылы Польшаның Гданьск қаласындағы Ұлттық мұражайынан ұрланған картинасы жарты ғасыр өткен соң Нидерландтан табылды. Бұл жаңалықты әйгілі өнер детективі Артур Бранд ашты. Оны өнер әлемінің "Индиана Джонсы" деп атайды.
«Көмір алып бара жатқан әйел» деп аталатын бұл картина шамамен 1626 жылы салынған. Диаметрі небәрі 17 сантиметр болатын дөңгелек туындыда қолында шоқ көмір мен қазанды ұстап келе жатқан шаруа әйел бейнеленген. Сурет ескі голланд мақалына, екіжүзділікке меңзейді.
Бірнеше онжылдық бойы бұл картинаның қайда екені беймәлім болып келді. Польшада оның жоғалуына елдің арнайы қызметтері қатысы болуы мүмкін деген болжамдар да айтылған.
2023 жылы бұл туынды жеке коллекционерден Нидерландтағы Гауда қаласының мұражайына табысталған. Ол ұрланған өнер туындыларының халықаралық базасында тіркелмегендіктен, мұражай қызметкерлері оны көрмеге қойған.
Алайда голландиялық Vind өнер журналының жарияланымынан кейін Артур Бранд картинаның ұрланған түпнұсқа екенін анықтады. Қазіргі таңда Нидерланд пен Польша билігі оны отанына қайтару бойынша жұмыс жүргізіп жатыр. Польшаның Мәдениет министрлігі: «Біз Нидерланд билігімен тұрақты байланыстамыз», – деп растады.
Артур Бранд бұрын да бірнеше жоғалған өнер туындыларын тапқан. Соның бірі — 2020 жылы Амстердам мұражайынан ұрланған Винсент Ван Гогтың «Нюэнендегі көктемгі ауыл бағы» (1884) картинасы.
