Полиция тексерісі барысында бұл видеоның 2023 жылы түсірілгені анықталды
ШҚО полиция департаменті әлеуметтік желілерде тараған жасөспірімдер арасындағы жанжал видеосына қатысты пікір білдірді.
Бейнеролик сипаттамасында бірнеше жасөспірімнің мектеп оқушысын қорлағаны көрсетілген оқиға ШҚО-дағы мектептердің бірінде болғаны жазылған.
Полиция тексерісі барысында бұл видеоның 2023 жылы түсірілгені анықталды.
“Полицияға бұл оқиғаға қатысты ешқандай шағым түскен жоқ. Қазіргі уақытта аталған факт ресми түрде тіркелді”, – деп хабарлады ШҚО ПД.
Тәртіп сақшылары жанжалға қатысқан барлық жасөспірімдерді анықтады.
“Кәмелетке толмағандар ата-аналарымен бірге полицияға жеткізілді, оларға қатысты профилактикалық әңгіме жүргізілді. Материалдар әкімдік жанындағы кәмелетке толмағандардың құқықтарын қорғау жөніндегі комиссияға жолданды. Кінәлілер есепке алынып, олармен әрі қарай алдын алу жұмыстары жүргізіледі”, – деп мәлімдеді полициядан.
