Мазмұны
Осы аптада Астана қаласының Сарыарқа ауданында «Таза Қазақстан. Астана – тазалық пен тәртіптің үлгісі» ауқымды экологиялық бағдарламасы аясында ағаш отырғызу және аумақты тазарту акциясы өтті. Іс-шара экологияны жақсартуға және жайлы қалалық ортаны құруға бағытталған.
Аудан тұрғындары, еріктілер мен аудан әкімдігінің қызметкерлері қатысқан тазалық акциясында жүзден астам көшет, соның ішінде үйеңкі, жөке, қарағай мен сирень отырғызды. Бұл шара қаланы сәулеттендіріп қана қоймай, ауаның ластануымен күресуге көмектеседі. Сонымен қатар, Жеңіс даңғылының бойындағы аумақты тазарту жұмыстары жүргізіліп, қоқыстар жиналды.
Мұндай бастамалар қоғамдастықты біріктіруге, азаматтық жауапкершілікті арттыруға және табиғатқа қамқорлық мәдениетін қалыптастыруға ықпал етеді. Ұйымдастырушылар Астанада тұрақты түрде көгалдандыру және абаттандыру шаралары жүргізіліп жатқанын атап өтті.
– Бұл – қаланы таза және әдемі қалпында сақтауға тамаша мүмкіндік. Біз көршілермен бірге бірнеше ағаш отырғыздық, қоқыстарды алып тастадық және айналаны абаттандырдық. Мұндай іс-шаралар жиірек өткізіледі деп сенемін, өйткені біз бәріміз қаламыздың таза және жасыл желекті болғанын қалаймыз, – деді Сарыарқа ауданының тұрғындарының бірі.
Саябақты абаттандыру жұмысы жалғасып жатқанын айта кеткен жөн. Жаңа жасыл желектерден басқа, демалыс аймақтары, әртүрлі жастағы топтарға арналған балалар ойын алаңы, сондай-ақ спорттық алаңқайлар құрылғылармен жабдықталады.
Естеріңізге сала кетейік, биыл Астанада бір миллионға жуық жасыл желек (ағаштар, бұталар, көшеттер және т.б.) отырғызу жоспарланған.
«Таза Қазақстан» жобасы аясында жүргізілген жұмыстар негізінен көгалдандыру мен қаланың экологиялық жағдайын оңалтуға бағытталған. Жоба аясында отырғызылған миллиондаған ағаш ауа сапасы мен қаланың экологиялық жағдайын жақсартады. Сонымен қатар климаттың өзгеруіне қарсы тұруға, ауаның ластануын азайтуға және биоәртүрлілікті сақтауға көмектеседі.
Бүкілқазақстандық акция ауылдар мен қалаларда жасыл аймақтар, саябақтар және демалыс орындарын көбейтуді мақсат етеді. Бұл – тұрғындардың жайлы өмір сүруіне және денсаулығын жақсартуға бағытталған ауқымды жоба.
Жоба қоғамның экологиялық сауаттылығын қалыптастырды және азаматтардың табиғатқа деген жауапкершілігін күшейтті. Оған қоса, қоғамдастықты біріктіріп, ортақ мақсатта жұмыс істеуге жұмылдырады. Сондай-ақ жасыл аймақтар қалаларға туристердің қызығушылығын оятып, тұрғындар мен қонақтар үшін жағымды орта қалыптастырады. Бұл болашақта елдің экономикалық дамуына да оң ықпал ететіні сөзсіз.
Жалпы, жоба елдің табиғи ресурстарын сақтап, тұрғындардың өмір сүру сапасын арттыруға бағытталған маңызды бастамаға айналып үлгерді.
А.БИМЕНДИЕВА
