«Буындырған»: Қостанай облысында 16 жастағы қызды өлтірді деген күдікті ұсталды
28 маусымда Әулиекөл маңындағы орман екпесінен қыздың денесі табылды.
![«Буындырған»: Қостанай облысында 16 жастағы қызды өлтірді деген күдікті ұсталды](https://turkystan.kz/cache/imagine/1200/uploads/resized-images/2024/07/1720608921.png)
Қостанай облысында 16 жастағы қызды өлтірді деген күдікті ұсталды. Бұл туралы облыстық полиция департаментінің баспасөз қызметі мәлімдеді.
16 жастағы Дарья Тайронина Әулиекөл кентіндегі үйінен 26 маусымда шығып, жоғалып кетті. Содан кейін полиция мен еріктілер оған іздеу жариялады. 28 маусымда Әулиекөл маңындағы орман екпесінен қыздың денесі табылды.
«Аса ауыр қылмыс жасады деген күдікпен 27 жастағы жергілікті тұрғын ұсталып, ол уақытша ұстау изоляторына қамалды», - деп мәлімдеді полиция.
Кісі өлтіру фактісі бойынша қажетті тергеу шаралары жүргізіліп, сараптамалар тағайындалды. Полицейлердің айтуынша, қыздың өліміне механикалық асфиксия себеп болған, яғни оны буындырып өлтірген.
«Жыныстық сипаттағы әрекеттерді жасау туралы сұраққа тек сараптаманың қорытындысы бойынша жауап беруге болады, басқа ақпарат тергеу мүддесі үшін жарияланбайды», - деді полиция.