Оқу-ағарту министрі Ғани Бейсембаев жыныстық сауаттылық туралы пәнді мектеп бағдарламасына енгізуге қатысты пікір білдірді, деп хабарлады turkystan.kz Massaget.kz сайтына сілтеме жасап.
"Қазақи дәстүрдегі ерекшеліктерді ескерсек, балаларға алдымен білім мен тәрбие беру керек. Биыл мектепке арналған біртұтас тәрбие беру бағдарламасында түрлі мәселелерді қарастырдық. Бірақ, менің ойымша, тәрбие дұрыс болуы үшін бұған ата-аналар да араласу керек. Бұған дейін де ата-аналарға арналған педагогикалық қолдау орталығы ашылатынын айтқан едім. Осы ретте біздің педагогтар ата-аналарға көмек көрсетуге әзір. Сол кезде тәрбиеге байланысты көп мәселелер шешілуі мүмкін", – деді ол.
Ғани Бейсембаевтың айтуынша, мектепте жыныстық сауат туралы жеке пән енгізілмейді.
"Ерте жүктілік мәселесін шешуде сіз айтқан шаралар көмектеспеуі мүмкін. Тағы да қайталап айтайын, діліміздің, дәстүріміздің ерекшеліктерін ескеру керек. Сондықтан бұл мәселені партада отырып емес, ата-аналармен бірге отырып шешу керек", – деді министр.