Петропавлда биыл жетім балаларға арналған 120 пәтер пайдалануға беріледі деп хабарлады turkystan.kz. Қаланың тұрғын үй-коммуналдық шаруашылығы бөлімінде халықтың әлеуметтік осал топтары үшін салынған тұрғын үйлерді бөлу тетігі түсіндірілді. Бұл санатқа жетім балалар мен ата-анасының қамқорлығынсыз қалған балалар да кіреді.
«Жетім балалар мен ата-анасының қамқорлығынсыз қалған балаларға коммуналдық тұрғын үй қорынан немесе жеке тұрғын үй қорынан жергілікті атқарушы органның құзіретіндегі тұрғын үйлердің жалпы санының 20%-ы бөлінеді. Соңғы үш жылда 5 үй қолданысқа енді. «Жетім балалар» санатындағыларға 108 пәтер берілді. Биыл алты 100 пәтерлік үйді қолданысқа беру жоспарланып отыр. Оның ішінде 120 пәтер жетім балаларға беріледі», - деп түсіндірді қалалық әкімдік өкілдері.Қалалық әкімдіктің ресми сайтында орналасқан мемлекеттік тұрғын үй қорынан баспана алу кезегі туралы ақпаратқа сәйкес, Петропавл қаласы бойынша «жетім балалар және ата-анасының қамқорлығынсыз қалған балалар» санатына кіретін 1 774 адам кезекте тұр. Олардың кейбірі - өз кезегін 2007 жылдан бері күтіп жүргендер.