Түркістан жасыл желекті қалаға айналады

Түркістан облысында «Қазақстан Республикасын индус­трия­­лық-инновациялық дамытудың 2015-2019 жылдарға ар­налған мемл­екеттік бағдарламасы» сәтті іске асырылуда. Бағдарламада «Келешекте индустрияландырудың кейінгі ке­зеңдерінде тиімді қазақ­стандық өндірушілердің өңірлік на­рықтарға жаппай шы­ғуына және орнығуына қолдау көрсетіледі. Бизнес пен мемлекеттің күш­-жі­­гері Қазақстанның индус­трия­лық-техно­ло­­гия­лық көшбасшы ел­дер­дің қа­та­рына кіруі қамтамасыз еті­ле­тін бір­неше ба­ғыт­та маман­да­нуын қалып­тас­тыру мен бе­кітуге, сон­дай-ақ, сұ­ранысқа ие жаңа тех­ноло­гия­ларды шоғырландыруға мүм­кіндік беретін қолайлы инновациялық ор­таны қа­лып­тастыруды аяқтауға жұ­мыл­ды­рылады. Түркістан облысы Кентау қала­сын­да шаруалардың басы қосылған ауқымды шара өтті. Облыс әкімі Өмір­зақ Шөкеевтің бастамасымен жүзе­ге асқан семинар-кеңесте 1200 бас­қа арналған тауарлы сүт фер­ма­сының кірпіші қаланды. Аталмыш цех Кентау қаласы Шаға ауылында 2020 жылы іске асады. Жобаның құны – 3 652,6 млн теңге.  Ашылатын тұрақты жұмыс орны 100 адамды құрамақ. Жылына 4500 тонна экстра класты сүт өндіру жоспар­ла­нуда. Жиында әр аудан-қаладан әкелін­ген өнім түрлерінен көр­ме болып, азық-түлік белдеуі шең­берінде, су нысандары бойынша іске асырылып жатқан жобалар мен ауыл шаруашылығы саласы көрсет­кіш­тері таныстырылды. Семинар-кеңес­тің ашы­луында сөз алған облыс әкімі Өмір­­зақ Шөкеев: «ҚР Үкімет тара­пы­нан бекітілген «Түркістан облысының әлеу­мет­тік-экономикалық дамытудың 2024 жылға дейінгі кешенді жоспары» аясында өңірде аграрлық салаға басымдық беріліп отырғандығын атап, бұрын Түркістан жасыл желекті қала болған, соны қалпына келтіруіміз керек. Сондай-ақ, демалыс аймақтарды көбейтіп салуымыз қажет», – деді. Семинар-кеңесте жаңа техноло­гия­лар­ды қолданып, бүгінде мол өнім ал­ған шаруалар өз тәжірибелерімен бө­ліс­ті. Ша­руа­лардың басым көпшілігі су мә­селесінің өзекті екенін айтты. Бү­гінде облыс әкі­мі­нің қолдауымен ке­шен­ді жоспар аясында ағын су мәсе­ле­лерін шешу мақсатында жал­пы құны 29,3 млрд теңге құрайтын 4 жобаны жүзеге асыру жұмыстары басталғаны мәлім болды. Жалпы, аталған жоба­лар­ды іске асыру нә­ти­же­сінде шаруаларға жеткізілетін ағын су көлемі ұлғайып, суармалы жер­лерді су­мен қамтамасыз ету дең­гейі жақ­сарылмақ. Мәселен, Түркістан қа­ласы аумағынан ра­диусы 15 ша­қы­рымда азық-түлік бел­деуі 2 кезеңде интен­сив­ті технология­лар­ды қолдана оты­рып және ғалымдардың сүйе­мелдеуімен жүзеге асырылуда. Бүгінгі таңда кешенді жоспар бойынша жалпы құны 63 млрд теңгені құрайтын 7 ірі ин­вес­­тициялық жобаларды іске асыру бойынша жұмыстар жүргізілуде. Нәти­же­сінде жыл сайын қосымша 30 млрд теңге ауыл шаруашылығы өнімі өндіріліп, 2500-ден астам жаңа жұмыс орындары ашылатын болады. Бұдан соң Түркістан облысы әкімі­нің орынбасары Мейіржан Мырзалиев бас­та­ған жұмыс тобы Мақтаарал, Же­ті­сай және Шардара аудандарының тұр­ғындарымен кездесті. Кәсіпкерлік саласы, инвестиция тарту, экспортты қолдау және т.б. салалар аясында атқа­ры­лып жатқан жұмыстармен бөлісті. Мейіржан Мырзалиевтің айтуын­ша, Түркістан облысы бойынша жалпы 138 мыңнан астам шағын және орта кәсіп­орындар жұмыс істейді. «Прези­дент­тің Жолдауында көрсетілген мін­дет­терге сәйкес, микро және шағын бизнесті 3 жылдық мерзімге салықтан босату тетіктері әзірленеді. Сонымен қатар, об­лыста «қарапайым заттар эконо­ми­касы» бағдарламасы белсенді түрде жүзеге асырылуда және Түр­кістан об­лысы нәтижелер бойынша көш бастап тұр», – деді облыс әкімінің орынбасары. Сапардың соңғы нысаны Шардара ау­даны, Алатау батыр ауылында ор­наласқан «International Company of Cotton» ЖШС мақта өңдеу зауытының инвестициялық жобасы болды. Инвес­тициялық жобаның сомасы 5,5 млрд теңгені құрайды. Мақта өңдеу зауыты осы жылдың қазан айында іске қосы­лады деп күтілуде. Бір жыл ішінде зауыт мақта талшығына 144 мың тонна мақта өңдейді. 47 мың тонна мақта талшығы өнімдері Қытайға, Сингапур Республикасына және Өзбекстанға экспортталады.

Тоғжан Төлеген

Түркістан облысы

 

Серіктес жаңалықтары