Денис Теннің өліміне қатысты үшінші адам ұсталды

Мәнерлеп сырғанаушы Денис Теннің өліміне қатысты үшінші адам ұсталған. Бұл туралы бас прокурордың орынбасары Марат Ахметжанов жұма күнгі брифингте хабарлаған. Ахметжановтың айтуынша, қазіргі кезде екі бап – “топ болып пайдакүнемдік ниетпен қасақана адам өлтіру” және “топ болып пайдакүнемдік ниетпен қарақышылық жасау” баптары бойынша қылмыстық іс қозғалған. - Бұл қылмысты жасады деген күдікпен үш адам ұсталған. Үшінші адамға – [қылмысты] хабарламау бойынша айып тағылып отыр. Жеткілікті дәрежеде дәлелдер жиналды, заңдылығын прокурор тексеріп жатыр. Сот қамауға рұқсат берді, - деген Марат Ахметжанов брифингте. Оның айтуынша, бас прокурордың өзі аталған істі бақылауына алған. Іс бойынша процессуалды прокурор тағайындалған. Алматы қаласы Алмалы аудандық сотына сілтеме жасап хабарлаған жергілікті ақпарат агенттіктері "сотқа Жанар Толыбаева деген күдіктіні екі айға қамау туралы өтініш түскен" деген ақпарат таратты. Informburo жаңалықтар агенттігінің хабарлауынша, күдікті Олимпиада чемпионы Денис Теннің өліміне қатысты ұсталған. Бұған дейін Денис Теннің қазасына күдікті ретінде 23 жастағы Арман Құдайбергенов пен 1994 жылы туған Нұралы Қиясов ұсталғаны белгілі болған. Прокуратура өкілдері Қиясовтың Денис Тенді өлтіргенін мойындағанын хабарлаған. 19 шілдеде Алматыда қазақстандық мәнерлеп сырғанаушы, Сочи олимпиадасының қола жүлдегері, Азия ойындарының чемпионы Денис Тен пышақ жарақатынан ауруханада қаза тапқан. Спортшы қала орталығында көлігінің жанында әлдекімдер салған пышақ жарақатынан ауруханаға жеткізілген соң қайтыс болған.