ءۇندىستاندا Samsung Electronics كومپانياسىنىڭ زاۋىتى اشىلدى

ءۇندىستان مەن وڭتۇستىك كورەيا دەنساۋلىق ساقتاۋ، تەلەكوممۋنيكاتسيا، كيبەرقاۋىپسىزدىك پەن ەكونميكا سالالارىن دامىتۋ ماقساتىندا 11 كەلىسىمگە قول قويدى، دەپ حابارلايدى حابار 24.

ەكى مەملەكەت تاۋاراينالىم قۇنىن 50 ميلليارد دوللارعا دەيىن جەتكىزۋدى جوسپارلاپ وتىر. سونىمەن قاتار وڭتۇستىك كورەيانىڭ ءىرى Samsung Electronics كومپانياسى ءۇندىستاننىڭ ۋتتار-پرادەش شتاتىندا سمارتفون شىعاراتىن زاۋىتىن اشتى. ەندى ەلەكتروندىق الىپتىڭ 10 پايىز ءونىمى وسى جەردە شىعارىلادى. ال الداعى 3 جىلدا بۇل كورسەتكىش 50 پايىزدى كورسەتۋى ءتيىس. بۇل تۋرالى بۇقارالىق اقپارات قۇرالدارى كومپانيانىڭ ءباسپاسوز قىزمەتىنە سىلتەمە جاساپ حابارلادى.

ايتا كەتۋ كەرەك، وسىعان دەيىن «ءۇندىستاندا جاسالعان» اتتى ۇكىمەت ناۋقانى اياسىندا سمارتفون كومپونەنتىن قۇراۋشى ءونىم يمپورتىنا باج سالىعىن سالعان بولاتىن. جەرگىلىكتى بيلىك ءۇندىستاندى ەلەكترونيكا ءونىمى ورتالىعىنا اينالدىرىپ، بىرنەشە ميلليون جۇمىس ورنىن اشۋدى كوزدەپ وتىر.

«Samsung كومپانياسىن شىن جۇرەكتەن قۇتتىقتايمىن. وڭتۇستىك كورەيانىڭ ەلەكترونيكا الەمىندەگى الىپ مەكەمەسىنىڭ زاۋىتى ءۇندىستاندا اشىلعانىنا قۋانىشتىمىن. بۇل جوباعا بولىنگەن 276 ميلليون دوللاردى قۇرايتىن ينۆەستيتسيا تەك Samsung-تىڭ جاعدايىن جاقسارتىپ قانا قويماي، ءۇندىستان مەن وڭتۇستىك كورەيا قارىم-قاتىناسىن نىعايتادى دەپ سەنەمىن»،-دەدى نارەندرا مودي، ءۇندىستان پرەمەر-ءمينيسترى.

 

ۇقساس جاڭالىقتار

Back to top button