استاناداعى ماڭىزدى سەمينار

ەكسترەميزممەن كۇرەستى ەڭ الدىمەن اقپاراتتىق-ءتۇسىندىرۋ توبىنىڭ جۇمىسىن جاقسارتۋدان باستاۋ كەرەك. وسى ماقساتتا استانادا وڭىرلىك اقپاراتتىق-ءتۇسىندىرۋ توبىنىڭ مۇشەلەرىنە ارنالعان «حالىقتىڭ ءدىنتانۋ ساۋاتتىلىعىن ارتتىرۋ ماسەلەلەرى بويىنشا اقپاراتتىق-ءتۇسىندىرۋ جۇمىستارىنىڭ تيىمدىلىگى» تاقىرىبى بويىنشا ەكىكۇندىك وقىتۋ سەمينارى ءوتتى. ءىس-شارانى قازاقستان رەسپۋبليكاسى ءدىن ىستەرى جانە ازاماتتىق قوعام مينيسترلىگىنىڭ ءدىن ىستەرى كوميتەتى ۇيىمداستىردى. سەمينارعا 100-گە جۋىق ادام قاتىستى. ونىڭ ىشىندە قر ءدىن ىستەرى جانە ازاماتتىق قوعام مينيسترلىگىنىڭ ءدىن ىستەرى كوميتەتى باسشىلىعى، قر ءبىلىم جانە عىلىم مينيسترلىگىنىڭ وكىلدەرى، قر ۇلتتىق قاۋىپسىزدىك كوميتەتى تەرروريزمگە قارسى ورتالىعىنىڭ وكىلدەرى، مادەنيەت پەن ءدىننىڭ حالىقارالىق ورتالىعى، وڭىرلىك ءدىن ىستەرى باسقارمالارى جانە ءدىن پروبلەمالارىن  زەرتتەۋ ورتالىعىنىڭ باسشىلارى، اقپاراتتىق-ءتۇسىندىرۋ توبىنىڭ مۇشەلەرى، بارلىق وڭىردەن عالىمدار، تەولوگتار، ءدىنتانۋشىلار قاتىستى.

سەميناردىڭ ءبىرىنشى كۇنى ءدىن ىستەرى كوميتەتى توراعاسىنىڭ مىندەتىن اتقارۋشى ە.ا. وڭعارباەۆ ءوز سوزىندە: «ەكسترەميزممەن كۇرەستىڭ باستى قۇرالى رەتىندە اقپاراتتىق ءتۇسىندىرۋ توپتارى جۇمىستارىنىڭ تيىمدىلىگىن ارتتىرۋ قاجەت» دەدى. ول سەميناردا العان ءبىلىمدى وڭىرلەردەگى ارنايى توپتارمەن جۇمىس جۇرگىزۋدە پايدالانۋدى ۇسىندى.

سونداي-اق، «اڭسار» كەڭەس بەرۋ-وڭالتۋ ورتالىعىنىڭ ديرەكتورى ا.ق. سابدين قاج مەكەمەلەرىندەگى سوتتالعاندار مەن دەسترۋكتيۆتى ءدىني اعىمداردىڭ قۇرباندارىن وڭالتۋ تاقىرىبىندا ترەنينگ وتكىزدى.

– ترەنينگتە دەراديكاليزاتسيانى قۇراۋشى ارگۋمەنتاتسيا جانە كونترارگۋمەنتاتسيا تاقىرىبى قوزعالدى. بۇل ەكى ءادىس راديكالدى سەكتالاردىڭ جەتەگىندە كەتكەن ادامداردى وڭالتۋدىڭ نەگىزگى ادىستەرى. وسى رەتتە، اتالعان سالاداعى ءدىنتانۋشى ماماندار جانە دە ساراپشىلارمەن تەوريالىق نەگىزدە ءبىرشاما جۇمىستار اتقارۋ كەرەك دەپ سانايمىن،  – دەدى. ا.ق. سابدين

ونىڭ ايتۋىنشا، الەم ەلدەرى ءۇشىن ەكسترەميزم قاۋپى تولىقتاي سەيىلە قويعان جوق. ءتىپتى، كوپتەگەن ەلدەردە تەرروريستىك قاۋىپ-قاتەرلەر كۇن ساناپ ارتىپ كەلەدى.

– ۋاقىت وتكەن سايىن ءدىني ەكسترەميزم كەڭىنەن قانات جايۋدا. وعان دالەل، جات اعىمدى ناسيحاتتاۋشى ۇيىمدار مەن توپتاردىڭ ءوز اۋماقتارى، رەسۋرستارى قالىپتاسقان. ولار ءوز ماقساتتارىنا جەتۋ ءۇشىن زاماناۋي تەحنولوگيالار مەن الەۋمەتتىك جەلىلەردى قولدانادى. يدەولوگيالارىن ناسيحاتتايتىن ادىستەمەلەرىن جەتىلدىرىپ، قىسىم جاساۋعا شاقىرادى. وسى ورايدا، ەكسترەميستەر مەن ءدىني راديكالدارعا ارنالعان دەراديكاليزاتسيا جانە الەۋمەتتىك وڭالتۋ باعدارلاماسى قولعا الىنۋدا. ونىڭ الەم دەڭگەيىندە ناتيجەسى دە جوق ەمەس، – دەدى ساراپشى.

بۇگىندە ءدىننىڭ قوعام الدىنداعى، ومىردەگى ءرولىن بەلگىلەپ، ناقتىلاۋ ايتارلىقتاي  ماڭىزعا يە بولىپ وتىر. بۇل رەتتە، الماتى وبلىسى الاكول اۋدانى ىشكى ساياسات ءبولىمىنىڭ باسشىسى م.سۇلەيمەنوۆ:

– باسەكەگە ءباس تىگىپ، قازاقستاننىڭ كەمەل كەلەشەگى مەن باياندى بولاشاعىن قالىپتاستىرۋدا ەلباسىنىڭ جارلىعىمەن ازىرلەنىپ، بەكىتىلگەن، اسا ماڭىزدى ستراتەگيالىق قۇجات سانالاتىن قازاقستان رەسپۋبليكاسىنىڭ ءدىن سالاسىنداعى مەملەكەتتىك ساياساتىنىڭ 2017 – 2020 جىلدارعا ارنالعان تۇجىرىمداماسى اتالعان سالانىڭ دامۋىنا تەمىرقازىق بولماق. بۇل – قۇجات  مەملەكەت ازاماتتاردىڭ قۇقىقتىق ار-وجدان بوستاندىعىن قامتاماسىز ەتىپ، ەلىمىزدە تىركەلگەن ءدىني بىرلەستىكتەردىڭ الاڭسىز جۇمىس ىستەۋى ءۇشىن قولايلى جاعداي جاساۋدا. سونداي-اق، مەملەكەت پەن ءدىن اراسىنداعى جۇيەنى قالىپتاستىرىپ، قارىم-قاتىناستار مەن كوزقاراستاردى ايقىندايدى، – دەپ ءوز ويىن ءبىلدىردى.

جيىنعا قاتىسقان مەشىت يمامدارى جانە ءدىن ىستەرى ءبولىمىنىڭ ماماندارى ءدىني ساۋاتتىلىقتى ارتتىرۋعا باعىتتالعان وسىنداي شارالاردىڭ بەرەرى مول دەگەن پىكىردە.

اقتوبە وبلىسى ءدىن ىستەرى باسقارماسىنىڭ باسشىسى قالماعامبەتوۆ جولداس نۇرلان ۇلىنىڭ ايتۋىنشا، وتكەن سەميناردان رەسپۋبليكا بويىنشا اقپاراتتىق ءتۇسىندىرۋ توپتارى جۇمىستارىنىڭ تيىمدىلىگى، ۇيلەستىرۋ تاسىلدەرى بويىنشا كەڭىنەن اقپارات الىندى.

– بىلىكتى ءدىنتانۋشى مامانداردىڭ پىكىرىن، ۇسىنىستارىن تىڭدادىق. تەرىس اعىمنىڭ جەتەگىنە كىرىپ كەتكەن ازاماتتارمەن سويلەسۋدىڭ ءادىس-تاسىلدەرىن، دايەكتەرىن مەڭگەردىك. بۇل العان ءبىلىمدى ءوز وڭىرىمىزدە قولدانىپ، اتقارار جۇمىستاردان وڭ ناتيجە شىعارۋ باستى ماقساتىمىز. ايتا كەتەرلىگى، اقتوبە وبلىسىندا 205 مۇشەدەن تۇراتىن اقپاراتتىق-ءتۇسىندىرۋ توبى جۇمىس ىستەيدى. سونىمەن قاتار، ءدىني باعىتتا وڭالتۋ جۇمىستارىمەن اينالىساتىن 22 ادامنان قۇرالعان «اڭسار» اقپاراتتىق تالداۋ ورتالىعى دا ىسكە قوسىلعان. بۇعان قوسا، وبلىس اكىمى ب.ساپاربەكوۆتىڭ تاپسىرماسىمەن ءدىني احۋالدى ودان ءارى تۇراقتاندىرۋ ءۇشىن وبلىستىڭ بەس اۋدانىندا كوممۋنالدىق مەكەمەلەر اشىلدى، – دەدى اقتوبە وبلىسى ءدىن ىستەرى باسقارماسىنىڭ باسشىسى. ونىڭ ايتۋىنشا، 2016 جىلى اقتوبە وبلىسى بويىنشا 346 ادام يسلامنىڭ ءداستۇرلى باعىتىنا اۋىسقان. ال بيىل 9 اي ىشىندە بۇل كورسەتكىش 535 ادامعا تولىقتى.

ەكىكۇندىك سەمينار بارىسىندا اقپاراتتىق-ءتۇسىندىرۋ توبىنىڭ قىزمەتىنىڭ تۇيتكىلدى ماسەلەلەرى بويىنشا پىكىر الماسۋلار ءوتتى. وزەكتى ماسەلەلەر انىقتالدى.

ءىس-شارا سوڭىندا قر ءدىن ىستەرى جانە ازاماتتىق قوعام مينيسترلىگى اتىنان وڭىرلىك ءدىن ىستەرى باسقارماسىنىڭ بەلسەندى مۇشەلەرىنە العىسحاتتار جانە قازىرگى زامانعى گادجەتتەر تابىس ەتىلدى.

 

ۇقساس جاڭالىقتار

Back to top button