ماڭىزدى جولعا ءمان بەرىلۋدە

رەسپۋبليكالىق ماڭىزداعى «وسكەمەن-زىريان-راحمان قاينارى» اۆتوكولىك جولى وبلىس ورتالىعىن كاتونقاراعاي اۋدانىمەن جالعاستىرىپ جاتىر. شىعىس قازاقستان وبلىسىنداعى كاتونقاراعاي اۋدانىندا ءتۋريزمدى دامىتۋ ماقساتىندا «قازاۆتوجول ۇك» اق ەمدەۋ ساناتوريلەرى مەن تۋريستىك بازالارعا جاقسى جاعدايدا جەتۋ ءۇشىن اۆتوكولىك جولدارىن قايتا جوندەۋ ماقساتىندا بىرقاتار شارالاردى جۇزەگە اسىرۋ ۇستىندە. كاتونقاراعاي اۋدانىندا ءتۋريزمدى دامىتۋ ءۇشىن مەملەكەتتىك ماڭىزى بار وسى اۆتوكولىك جولىن جاڭعىرتۋعا ەرەكشە ءمان بەرىلۋدە.

بۇگىنگى كۇنى «وسينوۆ» اسۋىنىڭ 56-72 شاقىرىمىندا اينالما جولدىڭ قۇرىلىسى جۇرگىزىلۋدە، ال كەلەسى جىلى 72-88 شاقىرىمداعى جولدى قايتا جوندەۋ قولعا الىنباق. بۇل جۇمىستاردى  «ابك اۆتودور نس» جشس باس مەردىگەر اتقارۋدا. اۆتوكولىك جولىن سالۋدىڭ ناتيجەسىندە سەل ءجۇرۋ قاۋپى بار جانە كۇردەلى بۇرىلىستاردى اينالىپ وتۋگە، ونىڭ ۇستىنە قاشىقتىقتى ءتورت شاقىرىمعا قىسقارتۋعا مۇمكىندك تۋاتىن بولادى.  «وسينوۆ» اسۋىن اينالىپ وتەتىن جول قۇرىلىسى 2020 جىلى اياقتالماق. 72-88 شاقىرىمداعى جولدى قايتا جوندەۋ  ناتيجەسىندە قاشىقتىقتى 16 شاقىرىمعا قىسقارتۋ، جولدى كەڭەيتۋ، ەلدى مەكەندەردى اينالىپ ءوتۋ، ساكىلى دەمالىس ورىندارى مەن قولايلى اجەتحانالار، اۆتوپاۆيلوندار ورناتۋ كوزدەلىنگەن. قايتا جوندەۋ جۇمىستارى بۇقتىرما سۋ قويماسىنداعى دەمالىس بازالارىنا اپاراتىن (كوگىلدىر بۇعاز، بۇقتىرما) جولدارمەن تۇيىستىرىلەدى. بۇل ۋچاسكەدەگى جۇمىس 2018 جىلدىڭ اياعىنا دەيىن اياقتالماق.

سونداي-اق، «وسينوۆ» اسۋىنداعى ىستەپ تۇرعان جولدىڭ 56-70 شاقىرىمىنداعى ارالىق جوندەلىپ (اسفالتبەتون توسەۋ) ءبىتتى. قاۋىپتى بۇرمالارعا اپاتتى جاعدايدا جولدان شىعىپ كەتپەۋ ءۇشىن تەمىر شىنجىرلار تارتىلدى، قارسى كەلە جاتقان اۆتوكولىكتەردى كورىپ وتىرۋعا ارنالعان كورىنىس اينالارى ورناتىلدى.

ۇستىمىزدەگى جىلى سولوۆەۆو سەلوسىنان كاتونقاراعاي اۋدانىنىڭ شەكاراسىنا دەيىنگى ۇزىندىعى 16 شاقىرىمعا سوزىلعان جول ورتا جوندەۋدەن وتكىزىلدى. ورەلدەن بەرەلگە دەيىنگى جولدى كۇردەلى جوندەۋدەن وتكىزۋ جۇمىستارى اياقتالۋعا جاقىن. بۇل ۋچاسكەدەگى جۇمىستاردى باس مەردىگەر «كاتونقاراعاي وندىرىستىك – جول ۋچاسكەسى» جشس اتقارۋدا. قاشىقتىعى 19،5 شاقىرىمعا سوزىلىپ جاتقان بۇل جول تورابى كۇردەلى جوندەۋدەن وتكىزىلگەننەن كەيىن بەرەل قورعانىنا، ەمدەۋ ساناتوريلەرى مەن تۋريستىك بازالارعا جايلى جەتۋگە  بولادى. جوندەۋ جۇمىستارى وسى جىلدىڭ اياعىندا اياقتالادى. وبلىستاعى رەسپۋبليكالىق ماڭىزى بار جولداردى جاڭعىرتۋدا يگىلىكتى ىستەر اتقارىپ جاتقان «قازاۆتوجول»ۇق» اكتسيونەرلىك قوعامى شىعىس قازاقستان وبلىستىق فيليالىنىڭ ديرەكتورى نۇرلانبەك بالىقباي ۇلى ومىرباەۆ باسقاراتىن ۇجىمدى ماقتان ەتۋگە بولادى.

 

ميرا بەرىكبولوۆا

 

ۇقساس جاڭالىقتار

Back to top button