قونىس اۋدارۋ قيىن ەمەس

قازىرگى تاڭدا وڭتۇستىك وبلىستاردان 2 مىڭ 388 وتباسى سولتۇستىك وڭىرلەرگە ەرىكتى تۇردە قونىس اۋدارۋعا نيەتتى. قر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ءبىرجان نۇرىمبەتوۆتىڭ ايتۋىنشا، قونىس اۋدارۋعا نيەتتى وتباسىلارعا جەر تەلىمدەرى ەش كەدەرگىسىز بەرىلەدى.

ەلىمىز بويىنشا جۇمىس كۇشى تاپشى ءوڭىر رەتىندە پاۆلودار، سولتۇستىك قازاقستان، شىعىس قازاقستان جانە قوستاناي وبلىستارى ۇسىنىلدى. ال ادام سانى كوپ ءوڭىر رەتىندە وڭتۇستىك قازاقستان، جامبىل، الماتى، ماڭعىستاۋ وبلىستارى ايقىندالدى.

اعىمداعى جىلى وڭتۇستىك قازاقستان، ماڭعىستاۋ جانە الماتى وبلىستارىندا سولتۇستىك وڭىرلىك جۇمىس بەرۋشىلەرىنىڭ قاتىسۋىمەن بوس ورىندار جارمەڭكەلەرى وتكىزىلدى. ناتيجەسىندە، 2 مىڭ 388 وتباسى سولتۇستىك وڭىرلەردە ۇسىنىلعان جۇمىسقا ورنالاسا وتىرىپ، ەرىكتى تۇردە قونىس اۋدارۋعا نيەت بىلدىرگەن. «بۇگىنگە باعدارلاما شەڭبەرىندە وڭتۇستىكتەن سولتۇستىك وڭىرلەرگە 172 وتباسى ەرىكتى تۇردە قونىس اۋداردى جانە 1 مىڭ 279 وتباسى قونىس اۋدارۋعا دايىن. ارينە، ازىرگە بۇل وتە از كولەم. سوندىقتان ءبىز بۇل ماسەلەنى جەكە قاراپ، تالداۋ جاسادىق»، – دەدى قر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ءبىرجان نۇرىمبەتوۆ.

قونىس اۋدارۋعا نيەت بىلدىرگەندەردىڭ ءبىر لەگى – ماڭعىستاۋ وبلىسىندا. ماڭعىستاۋ – مۇنايلى ءوڭىر، بىراق تۇرعىنداردىڭ بارلىعى بىردەي مۇناي سەكتورىندا جۇمىس ىستەي المايتىنى انىق. ماڭعىستاۋ وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى بۇل باعىتتاعى جۇمىستى قارقىندى جۇرگىزىپ كەلەدى. «بيىلعى جىلدىڭ مامىر ايىندا العاش رەت اقتاۋدا ەرىكتى قونىس اۋدارۋشىلار فورۋمى ءوتتى. ەكى كۇنگە سوزىلعان فورۋم اقتاۋ، جاڭاوزەن قالالارى مەن مۇنايلى اۋدانىندا ۇيىمداستىرىلدى. 600 ادام قاتىسقان فورۋم اياسىندا بوس جۇمىس ورىندارىنىڭ جارمەڭكەسى ءوتىپ، وعان 400-دەن استام ادام قاتىستى. سونداي-اق، ورالمان قانداستارىمىز كوپ شوعىرلانعان مۇنايلى اۋدانىندا حالىقپەن كەزدەسۋ ءوتىپ، ەرىكتى قونىس اۋدارۋدىڭ ءمان-ماڭىزى ءتۇسىندىرىلدى»، – دەيدى ماڭعىستاۋ وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى گۇلجيحان امانجان.

اتالعان باسقارما دەرەگى بويىنشا، شىعىس قازاقستان وبلىسىندا ءبىلىم بەرۋ، دەنساۋلىق ساقتاۋ سالالارىنا، مەملەكەتتىك قىزمەتكە، سونداي-اق، اۋىل شارۋاشىلىعى مەن كوممۋنالدىق سالالارعا 219 ادامعا جۇمىس ورنى بار دەپ كورسەتىلگەن. ال پاۆلودار وبلىسىندا 500-دەن استام، قوستاناي وبلىسىندا 30-عا تارتا گاز، ەلەكترمەن دانەكەرلەۋشى، مۇعالىم، مەحانيزاتور، جۇرگىزۋشى، ارنايى تەحنيكا جۇرگىزۋشىسى، ۆەتەرينار، دارىگەر، فەلدشەر ماماندار قاجەت ەكەن. سول سياقتى سولتۇستىك قازاقستان وبلىسىنداعى 790 بوس جۇمىس ورنى مۇعالىم، دارىگەر، بيۋدجەت سالاسى ماماندارىن، اۋىل شارۋاشىلىعىنا قىزمەت ەتەتىن ەڭبەككەرلەردى شاقىرۋدا.

بيىل ماڭعىستاۋ وبلىسىنان قوستاناي وبلىسىنا كوشۋگە 200-گە جۋىق وتباسى دايار. بىراق ولاردىىڭ بارلىعىنا دايىن جۇمىس ورنى جوق بولعاندىقتان، باعدارلامانىڭ ەكىنشى باعىتى بويىنشا جۇمىس باستالعان. اتاپ ايتقاندا، ەگەر سولتۇستىك وبلىستاردا وزدەرى بيزنەس اشسا نەمەسە كاسىبىن جالعاستىرسا، سولتۇستىك وبلىستاردىڭ اكىمدەرى جەر تەلىمدەرىن بەرۋگە دايىن. «ەگەر سولتۇستىك وبلىستارىنا قاجەتتى بيزنەس يدەيامەن كەلەتىن بولسا، گرانت بەرۋ ماسەلەسى قارالۋدا. سول سياقتى «سەرپىن» باعدارلاماسى ارقىلى ءبىلىم الىپ جاتقان 12 مىڭ بالانى وسى باعدارلاما اياسىندا وبلىستارعا جىبەرۋ قاراستىرىلىپ وتىر»، – دەدى قر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا.

2017 جىلى قونىس اۋدارۋشى 288 وتباسىنا كۆوتا بەكىتىلدى. دەمەك، كۆوتاعا ەنگەن  قاتىسۋشى وتباسىنىڭ ءاربىر مۇشەسىنە 35 اەك مولشەرىندە (79 415 تەڭگە) ءبىر رەتتىك سۋبسيديا جانە تۇرعىن ءۇي جالداۋ، كوممۋنالدىق قىزمەتتەرگە اقى تولەۋ شىعىستارىن وتەۋگە ءبىر جىل ىشىندە 180-360 اەك مولشەرىندە سۋبسيديالار (408 420-816 840 تەڭگە) بەرىلەدى. وسى ورايدا قونىس اۋدارۋشىلارعا كوشى-قون شىعىندارىن وتەۋگە جانە تۇرعىن ءۇي جالداۋعا سۋبسيديانى ساقتاۋ، قونىس اۋدارۋشىلاردىڭ بارلىق ورنالاسۋ ماسەلەلەرىن شەشۋ مەن جۇمىس بەرۋشىلەرگە سۋبسيديا بەرۋ قاراستىرىلعان. سونىمەن قاتار «تۇرعىن-قۇرىلىس ءۇي جيناق بانكى» ارقىلى قونىس اۋدارۋشىلارعا تۇرعىن ۇيلىك نەسيە مەن سۋبسيديالاردى بەرۋدىڭ جەڭىلدەتىلگەن جۇيەسى، اۋىل شارۋاشىلىعىمەن اينالىسۋ ءۇشىن وتەۋسىز پايدالانۋ قۇقىعىندا كونكۋرسسىز جەر تەلىمدەرىن بەرۋ دە قاراستىرىلىپ وتىر. ال جاڭا بيزنەس يدەيالارى بار «باستاۋ» بيزنەس جوباسى بويىنشا ءبىلىم العان جانە كاسىپكەر پالاتاسىنىڭ وڭ قورىتىندىسىنا يە بولعان قونىس اۋدارۋشىلارعا گرانتتار بەرىلەدى. سونداي-اق، «سەرپىن-2050» جوباسىنا قاتىسۋشى تۇلەكتەردى ولاردىڭ شىققان وڭىرلەرىنە قاراماستان باعدارلاما قاتىسۋشىلارى قۇرامىنا ەنگىزۋ تەتىكتەرى ەسكەرىلىپ وتىر. «وسىلايشا، جوبالىق باسقارۋ اياسىندا ءبىز 2018-2022 جىلدارى ەرىكتى تۇردە قونىس اۋدارۋعا جوسپارلاعان 59 مىڭ وتباسى بويىنشا باعدارلاماعا قىركۇيەك ايىندا، سونداي-اق، كەيبىر زاڭنامالىق اكتىلەرگە جىل سوڭىنا دەيىن وزگەرىستەر ەنگىزەمىز. بۇل شارالارعا قاجەتتى قوسىمشا قاراجات ونىڭ ىشىندە 2018 جىلعا 7،3 ميلليارد تەڭگە تولىقتاي ەسەپتەلىپ، بۇگىندە قارجى مينيسترلىگىمەن بىرگە پىسىقتالۋدا»، – دەدى نۇرىمبەتوۆ مىرزا.

ءدال قازىر باعدارلاما بويىنشا قونىس اۋدارۋعا نيەتتى وتباسىلار كوپتەپ تىركەلۋدە. ەڭ باستىسى، كۆوتا سانىن ارتتىرۋ ارقىلى وڭتۇستىكتىڭ سولتۇستىككە كوشىن جىلدامداتسا بولعانى…

ۇقساس جاڭالىقتار

Back to top button