ەلىمىزدە 14،7 ملن توننا استىق باستىرىلدى

سوڭعى مالىمەتتەرگە سايكەس، استىق القابىنىڭ 76،7 پايىزى ورىلىپ، 14،7 ملن توننا استىق باستىرىلدى. بۇل تۋرالى بۇگىن قر ۇكىمەتىنىڭ سەلەكورلىق رەجيمدەگى وتىرىسىندا قر اۋىل شارۋاشىلىعى ءبىرىنشى ۆيتسە-ءمينيسترى قايرات ايتۋعانوۆ ءمالىم ەتتى، دەپ حابارلايدى قازاقپارات.

«بۇگىنگى تاڭدا رەسپۋبليكا  بويىنشا 11،6 ملن گەكتار القاپتىڭ استىعى جينالىپ، 14،7 ملن توننا ءداندى داقىل باستىرىلدى. ەگىن جيناۋ ناۋقانى بىلتىرعى جىلدىڭ وسى ۋاقىتىمەن  سالىستىرعاندا، 2،4 ملن گەكتارعا نەمەسە 16 پايىزعا ارتىق. جالپى رەسپۋبليكا بويىنشا بارلىق ەگىستىك القاپتىڭ 76،7 پايىزى جينالدى. وڭتۇستىك، باتىس قازاقستان جانە جامبىل وبلىستارىندا ماساقتى ءداندى-داقىلداردى جيناۋ اياقتالدى»، – دەدى ول.

ءبىرىنشى ۆيتسە-ءمينيستردىڭ دەرەگىنشە، ەلىمىزدىڭ سولتۇستىگىندەگى باستى استىقتى وڭىرلەرىندە 10،6 ملن توننا استىق جينالعان. اتاپ ايتقاندا، اقمولا وبلىسىندا 3،5 ملن، سقو-دا 3،3 جانە قوستاناي وبلىسىندا 3،8 ملن توننا استىق باستىرىلدى. سونىمەن قاتار ول بيداي، ارپا، باۋ-باقشا جانە مايلى داقىلداردى جيناۋ جۇمىستارىنا دا توقتالدى.

«ارپانى جيناۋ جۇمىستارى اياقتالۋدا. قازىرگى ۋاقىتتا 1،8 ملن گەكتار نەمەسە جالپى اۋماقتىڭ 86 پايىزى جينالىپ، 2،7 ملن توننا ءونىم الىندى. بۇل كورسەتكىش بىلتىرعى جىلدىڭ كولەمىنەن 10 پايىزعا ارتىق. باقشا داقىلدارىن  جيناۋ جۇمىستارى دا جالعاسۋدا. الماتى، جامبىل، وڭتۇستىك قازاقستان وبلىستارى بويىنشا ەگىستىك القابىنىڭ 76 پايىزى جينالىپ، ودان 3،1 ملن توننا ءونىم الىنىپ وتىر. قانت قىزىلشاسى بىلتىرعى جىلمەن سالىستىرعاندا 1،5 ەسە ارتىق جينالادى دەپ كۇتىلۋدە»، – دەدى قايرات ايتۋعانوۆ.

 

ۇقساس جاڭالىقتار

Back to top button