Балаларды цифрлық ортада қорғайтын нақты іс-шаралар қажет – Әсел Баденова

/
Балаларды цифрлық ортада қорғайтын нақты іс-шаралар қажет – Әсел Баденова
Құрылтайдың баспасөз қызметі

Құрылтай депутаты, «Әділет» партиясы фракциясының мүшесі Әсел Баденова Ішкі істер министрі Ержан Сәденовке цифрлық ортадағы балалардың қауіпсіздігіне қатысты депутаттық сауал жолдады, деп хабарлайды turkystan.kz.

«Балаларды зорлық-зомбылықтан, алымсақтықтан және басқа құқық бұзушылықтардан қорғау физикалық ортамен шектелмеуге тиіс. Бүгін цифрлық орта өмірдің бір бөлігіне айналды. Осы ортада балалардың қауіпсіздігін қамтамасыз етуіміз керек.

Осындай цифрлық қауіптердің бірі – киберфлешинг, әлеуметтік желілер және басқа цифрлық арналар арқылы адамның сұрауынсыз жыныстық сипаттағы суреттер мен материалдарды жіберу», – деді ол.

Депутаттың мәліметінше, Қазақстан балалары – 2026-2030 зерттеу деректеріне сәйкес, балалардың 7,1 пайызы жыныстық сипаттағы хабарламалар алады. Ал 7,4 пайызы айына кемінде бір рет жыныстық сипаттағы бейнелерді көреді.

«Осы бағытта маңызды сұрақ әлі де ашық: қылмыс белгілері болмаған жағдайда кәмелетке толмаған балаға оның сұрауынсыз жыныстық сипаттағы материалдарды қасақана жіберуге қандай жауапкершілік қарастырылған?

Ең маңыздысы – осындай жағдайларда мемлекетте нақты механизм, ал ата-аналар мен балаларда көмек алу мүмкіндігі болуы керек.

Ішкі Істер Министрлігінің ресми статистикасы бойынша, балаларға қатысты жыл сайын 800-ден астам қылмыс тіркеледі. Ал 2026 жылдың сегіз айында 624 қылмыс тіркелген. Қауіпті әрекеттер трагедияға айналмас бұрын алдын алу керек.

Мемлекет басшысы Қасым-Жомарт Кемелұлы Тоқаев құқық бұзушылықтың алдын алуға ерекше назар аударды: «Құқық бұзушылықтың алдын алу жұмыстарын күшейту қажет… Қылмыстың салдарымен ғана күресуге болмайды. Қылмыс себептерін анықтап, жойып отыру қажет».

Бұл қағида цифрлық ортада жұмыс жасауы керек. Бұл бірінші кезекте балаларға қатысты. Балаларды зорлық-зомбылықтың кез келген түрінен қорғау «Әділет» партиясының бағдарламасында көзделген», – деді Әсел Баденова.

Ол бүгінде цифрлық ортадағы қауіптерді тіркеу механизмі жоқ екенін айтып, балаларды интернеттегі жағымсыз әрекеттерден қорғау шараларын күшейтуді ұсынды.

«Құқықтық статистика комитетінің ресми деректеріне сәйкес, киберфлешинг фактілері бойынша жеке есеп жүргізілмейді.

Осыған байланысты Ішкі істер министрлігінен:

Осы құқықтық кемшілікке қатысты позициясын білдіруді сұраймын. Қылмыс белгілері болмаған жағдайда, адамға оның сұрауынсыз жыныстық сипаттағы материалдарды жібергені үшін жауапкершілікті күшейтуді сұраймын.

Бізге жай тәсіл емес, балаларды цифрлық ортада қорғайтын нақты әрі уақтылы шаралар қажет», – деді депутат.

Бөлісу:

Серіктес жаңалықтары


Қазақстан Тәуелсіздігіне 25 жыл
Жаңалықтар