Ұлыбритания королінің ұлы ханзада Харри мен жұбайы Меган Маркл тамызда елге оралғаннан кейін алғаш рет бірге қоғамдық іс-шараға қатысты. Ноттингем қаласында оларды тұрғындар қошеметпен қарсы алып, ерлі-зайыптылар жұртпен әңгімелесіп, суретке түсіп, гүл шоқтарын алды, деп хабарлайды turkystan.kz euronews.com-ға сілтеме жасап.
Сассекс герцогы мен герцогинясы атанған Харри мен Меган бейсенбі күні Ноттингем қаласында жастар мен жергілікті қауымдастықтарға қолдау көрсететін үш қайырымдылық ұйымына барды. Бұл ұйымдар музыка, кино және спорт арқылы жастарға мүмкіндік берумен қатар, азық-түлік тапшылығымен күресуге де атсалысады.
42 жастағы ханзада Харри мен 45 жастағы Меган Маркл 2020 жылы корольдік отбасының ресми міндеттерінен бас тартып, Ұлыбританиядан кеткен еді. Кейін олар АҚШ-тың Калифорния штатында тұрақтап, екі баласы Арчи мен Лилибетті сонда тәрбиеледі. Биыл тамызда ерлі-зайыптылардың Ұлыбританияға қайта оралғаны белгілі болды.
Олардың бұл жолғы сапары Бакингем сарайының ұстанымына қайшы келуі мүмкін. Өткен айда Корольдік үйдің жоғары лауазымды өкілі жариялаған хатта Харри мен Меганның мәртебесі жеке азаматтарға жақын екені айтылып, оларға «Корольдік мәртебелі» атауларын қолданбау керектігі ескертілген.
Хатта ерлі-зайыптылардың 2020 жылы монарх атынан ресми өкілдік ету міндеттерінен бас тартқаны және бұдан былай корольдік отбасының жұмыс істейтін мүшелері саналмайтыны көрсетілген. Сонымен бірге олардың қаржылық тәуелсіздігі мен жеке өміріне қатысты таңдау еркіндігі құрметтелетіні атап өтілген.
Корольдік отбасының ресми міндеттерін атқаратын мүшелері монархтың атынан қоғамдық және мемлекеттік іс-шараларға қатысады. Қазіргі таңда олардың қатарында король III Чарльз бен патшайым Камилла, тақ мұрагері ханзада Уильям мен Уэльс ханшайымы Кэтрин, сондай-ақ ханшайым Анна, ханзада Эдуард және оның жұбайы Софи бар.
Гарри мен Меганның корольдік отбасымен қарым-қатынасы 2020 жылғы шешімнен кейін күрделі кезеңді бастан өткерді. Ерлі-зайыптылар король III Чарльзбен байланысын қалпына келтіруге қадам жасағанымен, Гарридің ағасы әрі тақ мұрагері ханзада Уильяммен арадағы қарым-қатынасы әлі де алшақ күйде қалып отыр.
Марқұм патшайым II Елизавета да көзі тірісінде ерлі-зайыптыларға корольдік міндеттерді сақтай отырып, қатарынан коммерциялық қызметпен айналысуға мүмкіндік беретін аралық мәртебе болмайтынын нақты айтқан еді.
