Білім күні қарсаңында Ақтөбеден 25 шақырым жердегі Шилісай ауылындағы мектеп ашылды. Бұл құрылыстың аяқталуын шилісайлықтар 7 жыл күткен.
Шилісайға отбасы көшіп келген жылы Қорған үш жаста еді. Сол кезде де, қазір де ауылдың қай шетінен қарасаң да менмұндалап тұратын ең биік ғимарат үш қабатты жаңа мектеп болатын. Қабырғасы қаланып, шатыры жабылған мектептің құрылысы ол кезде толық аяқталмаған. Есік-терезелері үңірейіп, ғимарат қаңырап тұрды. Бірақ кішкентай Қорған үшін ол жай ғана құрылысы тоқтап қалған көп ғимараттың бірі емес еді.
– Мен осы мектепте оқимын, – дейтін тілі енді шыққан ұл анасына.
Арада бірнеше жыл өтті. Қорған дайындық сыныбына барар жасқа да жетті. Бірақ бала күн сайын қызыға қарайтын қызыл ғимарат оқушыларға есігін аша қоймады. Сөйтіп, Қорған өзі құралпы балалармен бірге дайындық сыныбын көрші ауылдағы ескі мектепке қатынап оқыды.
Биыл Қорған бірінші сыныпқа барды. Көрші ауылға емес, өз ауылындағы мектепке. Өйткені құрылысы 7 жылға созылған жаңа мектеп ашылып, Қорған секілді жүзден астам баланың арманы орындалды.
Шилісай ауылындағы 600 орындық жаңа мектеп алғашқы оқушыларына есігін 1 қыркүйек күні айқара ашты. Жаңа оқу жылында білім ордасына 110 бала қабылданған. Оның 14-і – мектеп табалдырығын алғаш рет аттаған бірінші сынып оқушылары. Қорған – сол 14 баланың бірі.
«Осы жерде оқимын» деген бала
Қорғанның анасы Жадыра Қасым мектептің ашылуын ауыл тұрғындары көп күткенін айтады.
– Қорған «сақалды құрылысқа» кішкентайынан қарап өсті. Шилісайдан жер алып, үй сала бастағанымызда ұлым үш жаста еді. «Мен осы жерде оқимын» деп көп айтатын. Сол арманы биыл орындалып отыр. Жаңа ғимараттың ішіне алғаш рет енгенде аузын ашып, қатты таңғалды. Дайындық сыныбын көрші ауылдағы ескі мектепке қатынап оқыған бала ғой. Еңселі, жарық мектепке келгеніне қатты қуанды, – дейді Жадыра.
Үш жасар кезінде құрылысы тоқтап қалған ғимаратқа қарап, өзін сол жерде оқып жүргендей елестеткен бала қазір сол мектептің оқушысы. Бұл – бір отбасы үшін ғана емес, бүкіл ауыл үшін қуанышты жаңалық.
Бір ауысымда білім алады
Үш қабатты жаңа мектепте 600 бала оқиды деп жоспарланған. Қазір оқушы саны аз болғандықтан, ұжым ғимараттың екі қабатын ғана пайдаланып отыр.
Ауыл тұрғындарының айтуынша, мектептің ашылуы балалардың күнделікті өміріне көп өзгеріс әкелген. Тіпті, сабақтан соң мектептің спорт залы мен ауласын айналшықтап шықпайтын оқушы көп.
– Балаларымыз бұрын осыдан 3-4 шақырым жердегі Садовое ауылына қатынап оқыды. Былтыр ауылдан 157 оқушы шықса, биыл мектеп жасындағы 110 бала бар. Мектеп ашылғанда ауыл халқы қатты қуанды. Таңғы 8-де мектепке келіп, салтанатты жиынның басталуын күтті, жиыннан кейін музыка қосылғанда би билеп, қуанышқа бөленді. Біз бұл мектептің салынып бітуін 2019 жылдан бері күттік қой. Бір жақсысы, балалар бір ауысыммен оқиды. Түстен кейін түрлі үйірмелерге қатыса алады, – дейді Жадыра.
Жаңа білім ордасының артықшылығы – тек оқу кабинеттерімен шектелмейді. Мектепте оқушылардың сабақтан тыс уақытын тиімді өткізуіне де мүмкіндік бар. Домбыра, би, қолөнер, автомодельдеу және сурет үйірмелері жұмысын бастады.
Бір бала үшін бұл өнерге алғашқы қадам болса, енді бірі үшін жаңа қызығушылықтың басталуы. Ал ауыл халқы үшін мұның мәні зор. Өйткені бала сабақтан шыққан соң 25 шақырым жердегі облыс орталығына шабылмай, үйдің іргесіндегі жаңа мектепте үйірмелерге қатысатын болды.
Жаңа жұмыс орындары ашылды
Жаңа білім ордасының ашылуы Шилісай тұрғындарына жұмыс орындарын да ұсынған.
– Мектептің ашылғанына қуанып отырмыз. Ауыл тұрғындарына да жұмыс табылды. Дипломы бар жас мамандар мұғалім болып орналасты, енді біреулері кіші қызметкер болып жұмыс істеп жүр. Бұл да біз үшін жақсы жаңалық, – дейді Жадыра Қасым.
Яғни, көп күттірген мектептің есігі балалар ғана емес, ауыл тұрғындары үшін де ашылды.
Мектеп ауылдағы ең ірі әлеуметтік нысан. Мұнда мұғалім, техникалық қызметкер, күзетші, асхана қызметкері сияқты түрлі маман иелеріне сұраныс пайда болды. Ал ауылда жұмыс орнының болуы тұрғындардың тұрақтап қалуына әсер ететіні анық.
600 орындық мектеп қашан толады?
Қазір Шилісай мектебінде 110 оқушы бар. Бұл оның 600 орындық жобалық қуатының шамамен бестен бір бөлігі ғана. Алайда ауыл тұрғындары бұған алаңдамайды. Керісінше, мектептің кең болуын «болашақты ойлай отыра жасалған батыл қадам» деп бағалап отыр.
– Қазір ауылымызға ауыз су құбыры тартылып жатыр. Ауыз су мәселесі де шешілмей, Шилісайдан жер алған азаматтар құрылыстарын тоқтатып қойған. Кейбіреулер салынып біткен үйлерін жауып, қаладан пәтер жалдап кеткен. Енді, міне, мектебіміз бар. Ауыз су мәселесі жуырда шешілер болса, тоқтап қалған құрылыстарға жан бітіп, халық саны тез арада көбейеді, бала саны артады деп үміттенеміз, – дейді Жадыра.
Оның бұл үміті жаңа мектептің ауыл өміріндегі рөлін көрсетеді.
Әлеуметтік нысандар салынған жерге тұрғындардың тұрақтауы да оңай. Ал ауылда мектептің болуы ең алдымен жас отбасылар үшін маңызды фактор.
Шилісай мектебі заманауи оқу кабинеттерімен жабдықталған. Ұл балаларға арналған технология кабинеті түрлі құрал-сайман, жабдықпен қамтылған. Оқушылардың теориялық білімін тәжірибемен ұштастырып, еңбек және техникалық дағдыларын дамытуға толық мүмкіндігі бар. Ал қосымша білім беру бағыттары балалардың шығармашылық қабілетін ашуға мүмкіндік береді.
Мектептің ашылу рәсіміне Ақтөбе облысы әкімінің орынбасары Жолдас Батырхан қатысты.
– Қадірменді ата-аналар, аяулы ұстаздарымыз, ардақты шәкірттеріміз! Ақтөбе қаласының іргесіндегі бұл мектеп – жас бүлдіршіндердің білім алып, тәрбиеленетін ордасы. Бүгін осы мектептің есігін алғаш ашып отырған бүлдіршіндеріміздің әрқайсы осы жерден білім алып, өз армандарына қадам басады деп сенеміз, – деді ол.
Жолдас Батырхан айтқан «өз армандарына қадам басады» деген тіркес Шилісай мектебінің бірінші сынып оқушысы Қорғанның тарихына ерекше үйлеседі. Үш жасында ауылдағы ең биік ғимаратқа алыстан қарап, «осында оқимын» деген бала қазір партада отыр.
Шилісайдағы 600 орындық мектептің алғашқы қоңырауы ауыл тұрғындарын қуантты. Оның тарихын ендігі жерде құрылысшылар емес, 110 оқушы жазатын болады. Ал сол тарихтың алғашқы парағында үш жасында «осында оқимын» деген Қорғанның да есімі бар.
Жанна КӨПЖАНОВА
