Bellingcat жүргізген тексеріс нәтижесінде Венгрия үкіметіне қатысты шамамен 800-ге жуық логин мен парольдің ашық дерекқорларға тарап кеткені белгілі болды. Мәліметтер 13 министрліктің 12-сіне қатысты, деп хабарлайды turkystan.kz theregister.com-ға сілтеме жасап.
Мәселе хакерлік шабуылдан емес, қарапайым қауіпсіздік талаптарының сақталмауынан туындаған. Көптеген қызметкерлер әлсіз парольдерді қолданған және оларды жылдар бойы өзгертпеген.
Мысалы, бір әскери қызметкердің паролі ағылшын футболшысы Фрэнк Лэмпард есімі болған. Басқа жағдайларда «password» немесе «cute» сияқты тым қарапайым комбинациялар пайдаланылған.
Зерттеуде қорғаныс саласына қатысты деректер ерекше назар аудартады. Шамамен 120 аккаунт әскери қызметкерлерге тиесілі. Олардың бір бөлігі NATO-ның 2023 жылғы онлайн оқыту платформасындағы деректердің таралуымен байланысты.
Мамандардың айтуынша, мұндай жағдайлар көбіне бірдей парольдерді әртүрлі жүйеде қолданудан және кибергигиенаның сақталмауынан болады. Кейбір деректер 2021 жылдан бері айналымда жүрсе, кейбірі 2026 жылға дейінгі жаңа ағып кетулерден табылған.
Бұл жағдай ұлттық қауіпсіздікке ең үлкен қатер сырттан емес, ішкі тәртіптің әлсіздігінен туындауы мүмкін екенін көрсетеді.
