Германия шығысындағы бұрынғы көмір карьерлерін қайта қалпына келтіру жобасы жаңа кезеңге шықты. Онда ондаған жыл бойы жүргізілген жұмыстар нәтижесінде Еуропадағы ең ірі жасанды көлдер жүйесінің бірі қалыптасып жатыр, деп хабарлайды turkystan.kz euronews.com-ға сілтеме жасап.
Жобаның соңғы нысаны – Лаузиц көлдер өлкесі аумағындағы Седлиц көлі. Ол осы айдың соңында алғаш рет демалушылар үшін ашылып, шомылу мен қайықпен жүзуге мүмкіндік береді.
Жалпы аумағы шамамен 14 мың гектар болатын бұл аймақ 20-дан астам жасанды көлден тұрады. Болашақта олардың бір бөлігі каналдар арқылы біріктіріліп, ірі су көлік және туризм жүйесіне айналмақ.
Аймақ Берлин мен Дрезден қалаларының арасында орналасқан. Бұрын бұл жерде қоңыр көмір белсенді өндірілген, соның салдарынан алып шұңқырлар пайда болған. Қазір сол карьерлер суға толтырылып, экологиялық және туристік аймаққа айналуда.
Жобаны LMBV жүзеге асырып жатыр. Компания ондаған кен орнын қалпына келтіріп, шамамен 50-ге жуық жасанды көл қалыптастыруды жоспарлаған.
Мамандардың айтуынша, бұл жоба екі ұрпаққа созылатын ұзақ процесс. Соған қарамастан, Лаузиц өңірі бүгінде Германиядағы ең тартымды туристік бағыттардың біріне айналып келеді, бұрынғы өндірістік аймақ енді демалыс пен экологияның символына айналуда.
