وڭتۇستىك كورەيانىڭ 30 ەلدى مەكەنىندە قازاق ەرتەگىسى ساحنالاندى

وڭتۇستىك كورەيادا قازاق ەرتەگىسى ساحنالاندى. بۇگىندە ونى 30 ەلدى مەكەن حالقى تاماشالاپ ۇلگەردى دەپ حابارلايدى 24.kz.

ەرتەگىنى ازيا مادەني ورتالىعى اۋدارعان. الداعى ۋاقىتتا ولار تاعى بىرنەشە قازاق ەرتەگىسىن كورەي تىلىندە سويلەتۋدى جوسپارلاپ وتىر. ازيا ورتالىعى كۆاندجۋدا ورنالاسقان. ورتالىقتىڭ مۇراعاتىندا قازاقستانداعى كورەي دياسپوراسىنىڭ وكىلى بەلگىلى كومپوزيتور تەن چۋدىڭ شىعارمالارى جيناقتالعان. ول وسى كۆاندجۋدا تۋعانىمەن، سانالى عۇمىرىن قازاق جەرىندە وتكىزدى. قىزدار پەداگوگيكالىق ينستيتۋتىندا، قازاق ۇلتتىق پەداگوگيكالىق ۋنيۆەرسيتەتىندە ابىرويمەن قىزمەت اتقاردى.

وسىدان 4 جىل بۇرىن تەن چۋ دۇنيەدەن وزدى. ازيا مادەني ورتالىعى ونىڭ مۋزىكالىق مۇرالارىن حالىققا تانىستىرۋدى ءجون سانايدى. سونىمەن قاتار، مادەني ورتالىقتىڭ كىتاپحاناسىنان ازيا ەلدەرى جازۋشىلارىن شىعارمالارىمەن تانىسۋعا بولادى. ازىرگە مۇندا قازاقستاندىق قالامگەرلەردىڭ كىتاپتارى جوق. بىراق الداعى ۋاقىتتا كورەيا مەن قازاقستان اراسىنداعى مادەني بايلانىستىڭ ناتيجەسىندە جۇمىس جاندانا تۇسەتىندىگىنە سەنىم مول.

پان سون گيۋ، ازيا مادەني ورتالىعىنىڭ پرەزيدەنتى:

– ءبىزدىڭ ورتالىق 2015 جىلدىڭ سوڭىنا قاراي اشىلدى. ازىرگە قازاقستاننىڭ مادەنيەتى تۋرالى جيناعان ماتەريالدارىمىز كوپ ەمەس. سوندىقتان سىزدەردىڭ مادەنيەت جانە سپورت مينيسترلىگىمەن كەلىسىپ جاتىرمىز. ولار دا بىزگە كومەك كورسەتۋگە دايىن ەكەندىكتەرىن جەتكىزدى. ازىرگە، كارىس تىلىنە قازاقتىڭ «جەزتىرناق»، «پەرى جانە ماماي» ەرتەگىلەرى اۋدارىلىپ، ساحنالاندى.

چوي دجين ي، ازيا مادەني ورتالىعى توبىنىڭ جەتەكشىسى:

– ءبىز سپەكتالدى قويۋ بارىسىندا قازاق حالقىنىڭ مادەنيەتىمەن جاقىنىراق تانىستىق. سالت داستۇرلەرى تۋرالى دەرەك جينادىق. قۋىرشاقتاردى دا ءوزىمىز جاسادىق. زاماناۋي اۋديو جانە بەينەتەحنيكا ءساتتى قولدانىلدى. قويىلىم قالانىڭ بىرنەشە تەاترىندا ساحنالانادى.

بيىل قازاقستان مەن كورەيا اراسىندا ديپلوماتيالىق قاتىناستىڭ ورناعانىنا 25 جىل تولادى. وسى ايتۋلى داتاعا وراي ازيا مادەني ورتالىعى قازاقستاندىق جازۋشىلار مەن سۋرەتشىلەردىڭ كورمەسىن ۇيىمداستىرۋدى جوسپارلاپ وتىر. سونىمەن قاتار، قازاق ەرتەگىلەرىنىڭ جيناعىن باسىپ شىعارماق.

ۇقساس جاڭالىقتار

Back to top button