Мемлекет басшысы Қасым-Жомарт Тоқаевтың «Таза Қазақстан» жалпыұлттық бастамасы аясында ел аумағында «AMANAT» партиясының «Таза бейсенбі» экологиялық акциясы жалғасын табуда. Бұл акция қоршаған ортаға жауапкершілікпен қарауға және экологиялық мәдениетті нығайтуға бағытталып отыр, деп хабарлайды turkystan.kz.
Мәселен Ақмола облысы Астрахан ауданы Астраханка ауылындағы Абылайхан көшесінде тазалық жұмысы жүргізілді. Мамандар жаңбыр суы ағатын ұзындығы 1700 метр каналды, сондай-ақ су өткізу сақиналарын тазалады. Қар тазалау және су тасқынына дайындық шараларына төтенше жағдайлар қызметінің өкілдері, әкімдік қызметкерлері, әскери қызметшілер және белсенді азаматтар атсалысты.
«Су тасқынына қарсы алдын алу шаралары тұрғындардың қауіпсіздігін қамтамасыз ету ісінде аса маңызды. Бірлесіп, осы қауіп-қатердің алдын алуға күш саламыз. Мұндай сәтте мемлекеттік құрылымдар, әскери қызметшілер және белсенді азаматтар бірлесе жұмыс істеуі қажет», – деді «AMANAT» партиясы Астрахан аудандық филиалының атқарушы хатшысы Құралбек Сүлейманов.
Шығыс Қазақстан облысы Шемонаиха ауданында тұрғындар мен партия белсенділері бұлақтардың арналарындағы қоқысты тазалады. Іс-шараға жергілікті атқарушы органдардың өкілдері, партия мүшелері, жастар және еріктілер қатысты.
«Тазалық жұмысын жүргізу арқылы тек қоршаған ортаны жақсартып қана қоймай, келер ұрпаққа үлгі көрсетіп отырмыз. Осындай игі іске аудан тұрғындарының белсенді қатысуы – ортақ мақсатқа деген жауапкершіліктің айқын көрінісі», – деді «AMANAT» партиясы Шемонаиха аудандық филиалының төрағасы Анастасия Тиц.
Ақтөбе облысы Ырғыз ауданында «Арай» бастауыш партия ұйымының жастары, волонтерлері және қоршаған ортаға бейжай қарамайтын белсенді азаматтар Ырғыз ауылының көшелерін тазалап, ағаштардың түбін әктеді.
«Бұған дейін Ырғыз өзені мен Сабындыкөл көлінің жағасында абаттандыру жұмысын жүргіздік. Себебі қоршаған ортаны таза ұстау – баршамызға ортақ міндет. Осындай іс-шаралар азаматтарды табиғатқа жанашырлықпен қарауға үндейді», – деді «AMANAT» партиясы Ырғыз аудандық филиалының атқарушы хатшысы Айымгүл Оразымбетова.
Батыс Қазақстан облысы Сырым ауданы Жымпиты ауылында партия мүшелері, жастар, сондай-ақ жергілікті тұрғындар тазалау және абаттандыру жұмысын жүргізді. Нәтижесінде 1 тоннаға жуық қоқыс жиналды.
«Ауылымыздың тазалығын сақтау – ортақ жауапкершілік. Сондықтан қоршаған ортаға жанашырлық танытуға үндейтін мұндай игі бастамалар қоғам үшін өте маңызды. Осындай акциялар азаматтардың бойында экологиялық мәдениет қалыптастырады», – деді «Мәдениет» бастауыш партия ұйымының төрағасы Динара Ихсанова.
Жетісу облысы Кербұлақ ауданындағы «Ардагерлер» саябағында тазалық жұмысы жүргізілді. Іс-шараға 30-ға жуық ауыл тұрғыны, аудандық партия филиалының қызметкерлері және белсенді жастар қатысып, саябақ аумағындағы қоқысты тазалады. Сондай-ақ жолдар мен тротуарлар тазаланып, арық жүйелері ретке келтірілді. Нәтижесінде 1,5 тонна қоқыс шығарылды.
«Табиғатты аялау, қоршаған ортаны қорғау және туған жерге жанашырлық таныту – әр азаматтың парызы. Әсіресе, ардагерлерге арналған саябақтың таза әрі көрікті болуы – баршамыздың ортақ міндетіміз», – деді «AMANAT» партиясы Кербұлақ аудандық филиалының төрағасы Гүлжан Каманбаева.
Қарағанды облысы Шахтинск қаласында партия мүшелері және белсенді жастар сквер мен аллеяларда санитарлық тазалық жұмысын жүргізіп, абаттандыру ісіне атсалысты. Қатысушылар қоғамдық орындарды қоқыстан тазартып, жаяу жүргіншілер жолын ретке келтірді.
«Таза бейсенбі» акциясы – бір реттік іс-шара емес, тұрғындардың тұрмысын жақсартуға бағытталған жүйелі жұмыстың бір бөлігі. Біз алдағы уақытта да осындай бастамаларды қолға алып, азаматтарды қоғамдық іске белсенді тартуды көздеп отырмыз», – деді «AMANAT» партиясы Шахтинск қалалық филиалының төрағасы Алмас Омарбеков.
Қостанай облысы Жітіқара ауданында «AMANAT» партиясының аудандық филиалының және «Жастар Рухы» жастар қанатының бастамасымен тазалық жұмысы ұйымдастырылды. Аталған іс-шара барысында жалғыз тұрып жатқан зейнеткерлердің шаруашылық нысандары шатырындағы қар тазаланды. Игі іске партияның аудандық филиалының активі мен еріктілер белсенді қатысып, тұрғындарға нақты көмек көрсетті. Бұл жұмыс су басу қаупінің алдын алу және қариялардың қауіпсіздігін қамтамасыз ету мақсатында қолға алынды. «Жастар Рухы» жастар қанаты Жітіқара аудандық филиалының жетекшісі Сабина Утешованың айтуынша, мұндай жұмыстар тек акция аясында ғана емес, жыл бойы тұрақты түрде жүргізілуде.
Павлодар облысы Май ауданы Көктөбе ауылында тұрғындар және «Ertis» жоғары инновациялық аграрлық колледжінің студенттері мен оқытушылары экологиялық акцияға қатысып, аталаған колледж аумағында тазалық жұмысын жүргізді.
Солтүстік Қазақстан облысы Есіл ауданы Явленка ауылында су бұру арналары тазаланып, қар шығарылды. Мемлекеттік органдардың өкілдері, партия белсенділері және жергілікті тұрғындар қатысқан экологиялық іс-шара барысында мамандар арналарын уақтылы тазалаудың маңызын атап өтті.
«Есіл ауданында су тасқыны мәселесі әлі де өзекті. Сондықтан қауіптің алдын алуға бағытталған іс-шараларды жүйелі түрде жүзеге асырып жатырмыз. Бірлескен күш-жігеріміз арқылы қауіпсіздікті қамтамасыз етуге, аумақты абаттандыруға бағытталған нақты қадамдар жасалуда», – деді «AMANAT» партиясы Есіл аудандық филиалының атқарушы хатшысы Азамат Некібаев.
Ұлытау облысы Жезқазған қаласында «Алғашқы құрылысшылар» алаңын тазалау жұмысы жүргізілді. Қатысушылар аумақты қоқыстан тазартып, айналаны абаттандыру ісіне өз үлесін қосты. Іс-шараға жалпы саны 20-ға жуық студент қатысып, 50 қап қоқыс шығарылды.
«Осындай ілкімді іс-шаралардың жиі ұйымдастырылуы – өте маңызды. Тазалық – баршамызға ортақ жауапкершілік. Сондықтан «AMANAT» партиясының «Таза бейсенбі» акциясы – көпке үлгі. Айналаның тазарып, көркейгенін көру – үлкен қуаныш. Әсіресе жастардың белсенділігі қуантады. Осындай игі істер арқылы туған жерімізді көркейтеміз», – деді Тау-кен металлургиялық колледжінің директоры Құсайын Жанаев.
