Елена Рыбакина (WTA рейтингінде 2-орын) АҚШ-тың Майами қаласында өтіп жатқан WTA 1000 сериясындағы турнирдің ширек финалына шықты, деп хабарлайды turkystan.kz.
1/8 финалда Рыбакина австралиялық Талия Гибсонға (68-орын) қарсы ойнап, екі сет қорытындысы бойынша жеңіске жетті — 6:2, 6:3.
Еске сала кетейік, бұған дейін Miami Open-2026 турнирінде Елена Рыбакина өз отандасы Юлия Путинцева (75-орын) — 6:3, 6:3 және украиналық Марта Костюк (28-орын) — 6:3, 6:4 есебімен жеңген болатын.
Ал Талия Гибсон Майамидегі турнирде бес матч өткізді: ол грузиялық Екатерина Горгодзе (165-орын), өзбекстандық Камилла Рахимова (82-орын) және чехиялық Сара Бейлек (41-орын) теннисшілерін жеңді. Бұдан кейін екі ірі сенсация жасап, жапониялық Наоми Осака (15-орын) мен америкалық Ива Йович (17-орын) спортшыларын ұтты.
Турнирдің жүлде қоры 9 415 725 долларды құрайды. Жекелей сында жеңіске жеткен теннисші 1 151 380 доллар табыс тауып, сондай-ақ 1000 рейтингтік ұпай иеленеді.
