Алтынға бергісіз қола

Екі күн бұрын парашаңғыдан Ұлттық құраманың көшбашысы Ербол Хамитов Италияда өтіп жатқан Қысқы Паралимпиада ойындарында Қазақстан қоржынына алғашқы медальді салды. Милан төрінде атой салған Михаил Шайдоровтың жеңісті жолын жалғаған Ербол қарымы мықты қарсыластарына қарамастан, жарыс бойы қарқынын бәсеңдетпей, соңғы метрге дейін жігер танытты.

Паралимпиаданың ашылу салтана­тында Қазақстан туын көтеріп шыққан 28 жастағы атлет парашаңғы жары­сы­нан 1 500 м классикалық спринт сайы­сын­да 2 минут 29 секунд уақыт көр­сет­кіші­мен мәре сызығын үшінші болып ке­сіп, қола жүлдеге қол жеткізді. Жа­рыс­­та бірінші орынды қытайлық Лю Цзы­сюй (2:28.9) иеленсе, ал күміс жүл­­­­дені бразилиялық Кристиан Вес­те­майер Рибера (2:29:9) еншіледі.
Мәреге жеткен бойда көз жасына ерік берген ол бапкерлер штабының құт­­тықтауын қабылдап тұрып, «Ке­ші­ріңіз­дерші» деп толқынысын жасыра ал­мады.

«Паралимпиада ойындарында көк туы­мызды биікке көтеру менің арма­ным еді. Аллаға шүкір, біз бүгін қола жүл­деге ие болдық. Екі ай бұрын Мем­ле­кет басшысы маған еліміздің туын та­быстады. Бұл маған үлкен жауап­кер­шілік болды. Сондай-ақ барша Қа­зақ­стан халқынан Әнұранымызды Ми­лан­да шырқата алмағаным үшін ке­шірім сұраймын! Мені қолдаған барша қа­зақстандықтарға алғыс білдіремін», – деді спортшы кейін журналистерге берген сұхбатында.

28 жастағы Ербол Хамитов та Олим­­­­­пиададағы қарсыластары секілді ата­ғынан ат үркетін мықты атлет. 2023 жыл пара шаңғы жарысынан әлем чем­пио­ны атанған ол дәл сол жылы пара­биат­лоннан әлем біріншілігінде қола алған. 2025 жылы парабиатлоннан әлем чемпионы атағын иеленіп, сол жы­лы Әлем кубогінің жалпы есебінде жеңіске жетіп, маусымның үздік спорт­шысы атанды. Бұл жетістік Қазақстан спор­тында 31 жылдан кейінгі тарихи жеңіс болды. Соңғы рет Хрусталь гло­бус­ті елімізге 1994 жылы шаңғышы Вла­димир Смирнов (1990/1991 және 1993/1994 жылғы маусым) әкелген еді.
Бұл – оның мансабындағы екінші Пара­лимпиада ойындары. Бейжің Пара­­­­­лимпиадасында сәтсіз өнер көр­сеткен ол біздің басылымға үш жыл бұ­рын берген сұхбатында Италияда өте­тін төртжылдықтың басты дода­сын­да чемпион атанбайынша тыным тап­пайтынын айтқан еді.

«Біз «Намысты қолдан бермейік» де­­­­генді жиі айтамыз ғой. Паралим­пиа­дада көрсеткен сәтсіздігім менің на­мы­сы­ма тиіп кетті. Сосын бұрынғыдан бе­тер мықтырақ болуды көздедім. Қа­теліктермен жұмыс істеп, көп жат­тық­тым. Еш босаңсымадым. Әлбетте, 2026 жылы Италияда өтетін Пара­лим­пиа­да­да чемпион атанғым келеді. Жарақат алып қалмасам, ол мақсатыма жетпей қоймаймын деп отырмын», – деген еді. 

Ербол кеше Италияда 10 шақырым қа­шықтықта отырып сырғанау сынына тағы да жарыс жолына шығып, мәре сызығын сегізінші болып кесті. Енді ол 15 наурыз күні 20 шақырымдық сайыс­қа тағы шықпақ.
Ербол Хамитовтан бөлек, Милан жә­не Кортина-д’Ампеццо Паралим­пиа­дасында Александр Герлиц, Сергей Усольцев, Юрий Березин, Нұрлан Али­мов, Владислав Кобаль және Анна Грачёва ел атынан сынға түсіп жатыр. Қа­зақстан құрамасы парашаңғы жары­сы мен парабиатлон спорт түрлері бойын­ша жарысқа қатысады.
Айта кетерлігі, Ербол Хамитовтың қола жүлдесі – Қазақстан қоржынын­да­ғы төртінші Паралипиада жүлдесі. Ал­ғашқы жүлде 1994 жылғы Лил­ле­хам­мер Паралимпиадасында бұйырды. Парашаңғышы Любовь Воробьева 10 шақырымдық классикалық стильдегі шаң­ғы сайысында күміс медаль жеңіп алды. Одан соң Ұлттық құрама жеті Пара­лимпиада қатарынан, атап айтсақ, Нагано, Солт-Лейк-Сити, Турин және Ван­куверде өткен басты додада жүлде­герлер қатарына іліне алмаған-тын. Тарихи жүлде 2018 жылғы қысқы Па­ра­­лимпиада ойындарында қоржынға түс­ті. Оңтүстік Кореяда өткен Пара­лим­­­­пиадада парашаңғышы Александр Колядин ел тарихындағы алғашқы ал­тын жүлдені иеленді. Ал Бейжіңде 2022 жылы өткен Ақ Паралимпиадада Алек­сандр Герлиц парабиатлоннан қо­ла жүлде еншілеген еді.