«AMANAT» партиясы Шымкент қалалық филиалы мәслихатының депутаты Талғат Ысқақов Астанада Мемлекет басашысының қатысуымен өткен барлық деңгейдегі мәслихат депутаттарының ІІІ республикалық форумында айтқан ұстанымы еліміздің халықаралық беделін көтеріп, әлемдік қауымдастықтағы орнын нығайта түсетінін айтады, деп хабарлайды turkystan.kz.
"Тәуелсіздік сарайында өткен жиында Мемлекет басшысы еліміздің халықаралық аренадағы орны, ел ішіндегі тұрақтылық пен қоғам дамуының негізгі бағыттары туралы маңызды ой айтты. Президенттің айтуынша, қазіргі Қазақстан көптеген мемлекеттен көш ілгері тұр. Қазір еліміздің экономикалық дамуы орнықты, саяси ахуалы тұрақты және түрлі дін мен мәдениетке құрметпен қарайтын мемлекет ретінде әлемге танылып отыр.
Мемлекет басшысы Қазақстан әрдайым бейбітшілік пен өзара түсіністік қағидаттарын ұстанатынын атап өтті. Еліміз өркениетаралық және дінаралық диалогты дамытуға, халықаралық құқық нормаларын сақтауға және мемлекеттер арасындағы сенім мен қауіпсіздік шараларын нығайтуға ерекше мән береді. Сонымен қатар Қазақстан ядролық қаруды таратпау саясатын қолдап, бейбіт қатар өмір сүру идеясын алға тартып келеді.
Менің ойымша, мұндай ұстаным еліміздің халықаралық беделін көтеріп, әлемдік қауымдастықтағы орнын нығайта түседі. Қазақстанның бейбітшілікке негізделген саясаты мемлекетіміздің тұрақты дамуына және сыртқы саясаттағы сенімді әріптес ретінде танылуына ықпал етіп отыр.
Мемлекет басшысы өз сөзінде еліміздің басты құндылығы бірлік пен татулық екеніне де ерекше тоқталды. Қазақстан – ешкімді жатырқамайтын, өзара сыйластықты жоғары қоятын мемлекет. Біздің қоғамда түрлі этнос пен мәдениет өкілдері бір шаңырақ астында тату-тәтті өмір сүріп келеді. Бұл – еліміздің басты жетістігінің бірі.
Президенттің айтуынша, қазір Қазақстан азаматтары әлемнің көптеген елінде білім алып, кәсібін жүргізіп, түрлі салада жетістікке жетіп жүр. Бұл еліміздің халықаралық деңгейдегі беделі жоғары, мүмкіндігі мол мемлекет екенін көрсетеді. Шын мәнінде, азаматтардың еркін жүріп-тұруы мен білім алуы – елдің дамуы мен тұрақтылығының айқын белгісі.
Менің ойымша, мұндай жетістіктер Қазақстанның дұрыс даму бағытын таңдағанын көрсетеді. Тұрақтылық пен келісім сақталған жерде ғана қоғам дамып, халықтың әл-ауқаты артады. Сондықтан мемлекетіміздің бейбітшілікке, бірлікке және өзара құрметке негізделген саясаты алдағы уақытта да ел дамуының негізгі тірегі бола береді.
Қорытындылай келе, Қазақстанның басты күші оның бірлігі мен тұрақтылығында дер едім. Осы құндылықтарды сақтай отырып, еліміз халықаралық аренадағы беделін көтеріп, азаматтарына жаңа мүмкіндіктер ашатын дамыған мемлекет ретінде алға қадам баса береді", – дейді депутат.
