Тіс жегісінің алдын алу үшін бактерияларды жою міндетті емес. Миннесота университетінің ғалымдары ауыз қуысындағы бактериялардың химиялық байланыс жүйесіне араласу арқылы тіс қақтарының құрамын сау бағытқа өзгертуге болатынын анықтады. Зерттеу нәтижелері NPJ Biofilms and Microbiomes журналында жарияланды, деп хабарлайды turkystan.kz.
Ғалымдардың түсіндіруінше, ауыз қуысындағы бактериялар жеке-дара өмір сүрмейді. Олар кворум-сенсинг деп аталатын механизм арқылы бір-бірімен сигналдық молекулалар алмасады. Бұл «химиялық тіл» микробтарға өз әрекеттерін үйлестіруге, гендердің белсенділігін реттеуге және қай бактерия түрінің басым болатынын анықтауға мүмкіндік береді. Ал осы тепе-теңдік бұзылса, микробиота кариес пен қызыл иек ауруларына бейім күйге ауысады.
Зерттеу барысында ғалымдар тіс қақтарының зертханалық модельдерін талдап, кейбір бактериялар қолданатын N-ацилгомосеринлактоны (AHL) деп аталатын сигналдық молекулаларға назар аударған. Арнайы ферменттердің көмегімен бұл сигналдарды бұғаттауға болатыны анықталған. Нәтижесінде бактериялар арасындағы «байланыс» әлсіреп, қабынумен байланысты микробтардың белсенділігі төмендеген, ал сау ауыз қуысына тән бактериялар керісінше көбейе бастаған.
Авторлардың айтуынша, тіс қақтарының қалыптасуы шағын экожүйенің дамуына ұқсайды. Алдымен зияны аз бактериялар пайда болады, бірақ қолайсыз жағдайларда агрессивті түрлер, соның ішінде пародонтитпен тығыз байланысты Porphyromonas gingivalis белсенділік танытады.
«Егер бактериялардың бір-бірімен сөйлесуіне кедергі келтірсек, тіс қақтарының қауымдастығын ауыз қуысының саулығымен байланысты бағытқа бұруға болады», – дейді зерттеу авторы, биохимик Микаэль Элиас.
Ғалымдар бұл тәсіл болашақта кариес пен қызыл иек ауруларының алдын алуға арналған жаңа профилактикалық құралдардың негізі болуы мүмкін екенін атап өтеді. Тістерді емдеуден гөрі, микробтық тепе-теңдікті сақтауға бағытталған әдістер стоматологиядағы келесі маңызды қадамға айналуы ықтимал.
