Билл Гейтс бір кезде Уоррен Баффетттің кеңесіне құлақ аспағанда, бүгінгі әлемдегі байлар тізімі басқаша болуы мүмкін еді. Қаржы сарапшыларының есептеуінше, Microsoft негізін қалаушының байлығы қазір 1,2-1,5 трлн доллар аралығында болып, оны жер бетіндегі ең ауқатты адамға айналдырар еді, деп хабарлайды turkystan.kz.
Бұрылыс нүктесі 2014 жылға сәйкес келеді. Сол кезде Гейтске оның көпжылдық серіктесі әрі досы Уоррен Баффетт «барлық жұмыртқаны бір себетке салма» деген классикалық кеңес береді. Нәтижесінде Билл Гейтс Microsoft акцияларының едәуір бөлігін сатып, капиталын түрлі активтерге бөлуді жөн көрді. Компания акциялары оның портфелінде аз ғана үлес ретінде қалды.
Бұл шешім қаржылық тұрғыдан сақтықтың үлгісі саналады. Дегенмен, кейінгі он жылда Microsoft акцияларының бағасы бірнеше есе өсіп, жасанды интеллект пен бұлт технологиялары дәуірінде компания нарықтағы ең қымбат корпорациялардың біріне айналды. Егер Гейтс бұрынғыдай негізгі байлығын Microsoft-та сақтағанда, оның жеке капиталы қазіргі көрсеткіштен бірнеше есе артық болар еді.
Осы оқиға капитализмнің ескі дилеммасын тағы бір мәрте еске салады: қауіпсіздік пе, әлде максималды пайда ма? Гейтс бірінші жолды таңдады, тәуекелді азайтып, байлығын әртараптандырды. Ал тарих оған екінші жолдың қаншалықты қымбат тұруы мүмкін екенін көрсетіп отыр.
Қалай болғанда да, Билл Гейтс бұл шешімнен ұтылушы санатында емес. Ол әлі де әлемдегі ең бай адамдардың қатарында және жеке капиталының едәуір бөлігін қайырымдылыққа бағыттап келеді. Бірақ бұл оқиға қаржы нарығында бір ғана кеңестің өзі триллион долларлық айырмашылыққа әкелуі мүмкін екенін айқын көрсетеді.
