Қарағандыда полицейлер жергілікті кәсіпкер әйелден ірі көлемде ақша бопсалады деп күдіктелген 30 жастағы ер адамды ұстады, деп хабарлайды turkystan.kz.
Қарағанды облысы полиция департаментінің мәліметінше, полицияға қаладағы сауда желілерінің бірінің 47 жастағы иесі жүгінген. Ол белгісіз адамдар өзіне өлтіреміз деп қорқытқанын, отбасы мүшелеріне қысым көрсеткенін және мүлкін жоямыз деп сес көрсеткенін, осылайша 700 мың доллар беруді талап еткенін айтқан.
Құқық қорғау органдары бопсалауға қатысты қылмыстық іс қозғап, жедел-іздестіру шараларын бастаған. Жұмыс барысында қылмысқа қатысы бар деген күдікті анықталды. Ер адам ұсталып, уақытша ұстау изоляторына қамалды.
Сот оған бұлтартпау шарасы ретінде қамауға алу түрін таңдады. Тергеу жалғасуда.
