Үй ішін гүлге толтыру – әрі сән, әрі денсаулыққа зор пайда әкеледі. Сарапшылардың айтуынша, кейбір үй өсімдіктері тек ауаны тазартып қана қоймай, терезе мен қабырғада жиі пайда болатын зеңнің алдын алады, деп хабарлайды turkystan.kz dailymail.co.uk-ге сілтеме жасап.
Бақша маманы Крис Боннеттің айтуынша, өсімдіктер ауадан артық ылғалды сіңіріп, үй ішіндегі ылғал деңгейін табиғи жолмен реттейді. Бұл зеңнің түзілу қаупін азайтады. Ал өсімдік маманы Коннор Таунингтің айтуынша, өсімдіктердің жапырақтары арқылы ауадағы су булары сіңіріліп, тамырларына өтеді, бұл процесс «фолярлы сіңіру» деп аталады. Мұндай табиғи «ылғал сіңіргіштерді» ванна, ас үй немесе кір жуатын бөлме секілді ылғалды жерлерге қойған тиімді.
Өсімдіктер тек ылғалмен емес, ауаның сапасын да жақсартады. Фотосинтез кезінде олар көмірқышқыл газын сіңіріп, таза оттегі бөледі, бұл үйдің микроклиматын жақсартып, көңіл-күйге де оң әсер етеді.
Мамандардың пікірінше, үйдің ауасын тазартуға және зеңнің алдын алуға ең пайдалы 7 өсімдік мына өсімдіктер:
- Спатифиллум (бейбітшілік лалагүлі) – ауаны тазартып, бензол мен формальдегид секілді токсиндерді сіңіреді. Бірақ үй жануарларына улы.
- Ағылшын шырмауығы (hedera helix) – ауадағы зең мен шаңды азайтады, тыныс алу жолдарын жеңілдетеді.
- Бостон папоротнигі (sword fern) – жоғары ылғалдылықты жақсы көреді және формальдегидті сүзеді.
- Хлорофитум (өрмек өсімдік) – ауаны тиімді тазартады, түтін мен зиянды газдарды кетіреді және жануарлар үшін қауіпсіз.
- Арека пальмасы – үй ішіндегі ылғал деңгейін теңестіріп, құрғақ тері мен аллергияның алдын алады.
- Сансевиерия (жылан өсімдік) – ауадан ылғал мен токсиндерді жұтып, түнде де оттегі бөледі.
- Crispy Wave (толқынды асплениум) – ерекше толқынды жапырақтары арқылы ауаны тазартып, бөлменің ылғал балансын сақтайды.
Дұрыс таңдалған өсімдік тек интерьерді көріктендіріп қана қоймай, үй ауасын табиғи жолмен тазартып, денсаулықты қорғауға көмектеседі. Ал зең мен ылғал мәселесі бар үйлер үшін бұл — ең қарапайым әрі экологиялық шешім.
