Қазақстан шикізатты қайта өңдеу өнімдерін дамытуға басымдық беріп отыр, себебі бұл – экономиканы тұрақты әрі болжауға болатын етудің жалғыз жолы. Бұл туралы ҚР Премьер-Министрінің кеңесшісі Әлішер Қожасбаев айтты, деп хабарлайды turkystan.kz.
Оның сөзінше, елдің дамуын мұнай бағасына сүйеніп жоспарлау мүмкін емес.
«Шикізат, әсіресе мұнай – өте құбылмалы: бірде баррелі 20 доллар, бірде 120. Осындай ауытқулар кезінде елдің 15 жылдық дамуын қалай жоспарлауға болады?! Ал пластик, мысалы, тұрақты және болжамды түрде өседі. Тіпті дерлік геометриялық прогрессиямен», — деді кеңесші.
Ол атап өткендей, дәл осы қайта өңдеу өнімдерін өндіру экономикаға тұрақтылық пен болжамдылық береді. Бұл өз кезегінде мұнай бағасына тәуелділікті азайтып, теңге бағамының ауытқуын төмендетеді және бюджетті тұрақтандырады.
«Міне, осы күрделі жол – технологияларды табу, келіссөздер жүргізу және оларды елімізге енгізу – бар стратегиямыздың ең басты әрі стратегиялық міндеті», — деп түйіндеді ол.
